Baǵbandar suranystyń joqtyǵynan almany dalaǵa tastap jatyr - Májilis depýtaty
«Keıingi jyldary ońtústiktegi baý-baqsha sharýashylyǵyna úlken mán berilip otyr. Óńirdiń tabıǵı-klımattyq jaǵdaıy tamasha baqsha ósirýge, elimizdi jemistermen tolyq qamtamasyz etýge, al artyǵyn eksporttaýǵa múmkindik beredi. Túrkistan oblysyndaǵy baý-baqsha 17,7 myń gektardy alyp jatyr, onyń 4,7 myń gektary – alma baqtary, bul jalpy elimiz boıynsha baý-baqsha alańynyń 43 paıyzyn qurap otyr. Qazaqstanda byltyr alma aǵashtary jaqsy ónim berdi, alaıda onyń basym bóligin ótkizýge qatysty úlken problemalar bolyp, aǵash basynda jınalmaı qalyp qoıdy. Negizgi másele - saýda jelileri men deldaldar usynatyn satyp alý baǵalarynyń tómendigi. Bir kelisi 100-150 teńge. Sondyqtan, baqshanyń bir bóligin jınaý ekonomıkalyq turǵydan tıimsiz, óıtkeni shyǵyndar kiristen asyp túsedi», - dedi F. Qarataev QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarınniń atyna joldaǵan saýalynda.
Onyń paıymynsha, ónimniń bir bóligin Belarýske nemese Reseıge eksportqa jiberý osy tyǵyryqtan shyǵý joly bolýy múmkin. Eýrazııalyq ekonomıkalyq odaq boıynsha soltústik kórshilerde jemisterge suranys bar jáne olar bir kelisine eń az degende 300 teńge tóleýge daıyn.
«Biraq elimizde bul saladaǵy taǵy bir problemaǵa toqtalsaq, daıyndaý jáne ótkizý júıesiniń bolmaýynan jemisti tıep, jóneltýge aıtarlyqtaı kedergi keltiredi. Al ishki naryqtaǵy alma ósirýshiler saýda jelileri artyqshylyq beretin ımporttyq ónimdermen básekelesýi kerek. Nátıjesinde, aýyl sharýashylyǵy ónimin óndirýshiler baqsha egýge jáne kútip ustaýǵa qomaqty qarajat jumsap, ósirilgen daıyn ónimdi polıgonǵa tastaýǵa májbúr», - dedi depýtat.
Osy oraıda ol alma eksportyna jaǵdaı jasaýdy surady.
«Saýda jelileriniń sórelerinde otandyq ónimge basymdyq berý máselesin pysyqtaý mańyzdy. Yntalandyrý sharalaryn qamtamasyz etý kerek. Іri qalalarda aýyl sharýashylyǵy taýaryn óndirýshiler óz ónimderin deldaldarsyz tikeleı sata alatyn kóterme saýda oryndaryn qamtamasyz etý qajet. Budan bólek, aýyl sharýashylyǵy ónimderin óndirýshiler men qaıta óńdeýshiler úshin ınternettegi elektrondyq saýda alańyn iske qosýdy suraımyz», - dedi Fahrıddın Qarataev.