Baǵany jasandy jolmen ustap turý gaz tapshylyǵyn týyndatýy múmkin - Toqaev
«Qazaqstannyń ekonomıkalyq jáne áleýmettik ál-aýqatynda gaz salasy mańyzdy ról atqarady. Jańa ónerkásip obektilerin engizý jáne eldi gazben qamtý esebinen ishki naryqta gazdy tutyný jyl saıyn artyp keledi. Keıingi 10 jylda eki eseden astam – 9 mıllıardtan 19 mıllıard tekshe metrge deıin ósti.
Elimizde kelesi jyldyń ózinde gaz tapshylyǵy bolatyny týraly boljamdar aıtylyp júr. Bul rette, gazdy eksporttyq naryqtan ishki naryqqa qaıta baǵdarlaý – valıýtalyq túsimniń joǵalýyna jáne saýda teńgeriminiń nasharlaýyna ákeletin májbúrli qadam ekenin túsiný kerek», - dedi Qasym-Jomart Toqaev.
Prezıdent atalǵan problemany sheshý úshin resýrstyq bazany ulǵaıtyp, gazdy qaıta óńdeý sharalaryn jolǵa qoıý qajettigin eske saldy.
«Gaz óndirý men óńdeýdi ulǵaıta otyryp qana memleket eksporttan paıda taýyp, ishki qajettilikterdi tolyq kólemde qamtamasyz ete alady. Sondyqtan, gaz óndirý jónindegi jańa jobalardyń fıskaldyq preferentsııalaryn pysyqtaǵan jón.
Sondaı-aq, Úkimet ulttyq kompanııalar arasynda fýnktsııalardy naqty bólýge tıis. Biz suıytylǵan munaı gazynyń bólshek saýdadaǵy baǵasyn retteý merzimin osy jyldyń sońyna deıin uzartýǵa májbúr boldyq. Alaıda, bolashaqta baǵany jasandy jolmen ustap turý tapshylyqqa ákelýi múmkin. Bul – naryq zańy. Sondyqtan, Úkimet baǵa aýytqýlaryna jol bermeı, saýda-sattyqty bastaý sharalaryn qabyldaýy kerek», - dedi Memleket basshysy.
Aıta ketsek, Prezıdent Qasym-Jomart Toqaev Úkimettiń keńeıtilgen otyrysynda geologııalyq aqparattyń ashyqtyǵyna jaýaptylardyń áreketin sabotajǵa teńedi.
Ashyq kózderden alynǵan foto