Baǵany qoldan qymbattatý faktilerin tapqan joq: Air Astana sot aktisimen kelispeı, shaǵym beredi
Eske sala keteıik, búgin tańerteń Básekelestikti qorǵaý jáne damytý agenttigi «Eır Astana» AQ-da tekserý júrgizgenin, onyń qorytyndy materıaldary sotqa joldanyp, sot kompanııaǵa 6,7 mlrd teńge aıyppul salǵanyn habarlaǵan edi.
Agenttik málimetinshe, Air Astana áýe kompanııasy áýetasymal naryǵyndaǵy ústem jaǵdaıdy teris paıdalanǵan.
Osyǵan baılanysty Air Astana málimdeme jasady.
«Kompanııa qurylǵan kúninen bastap óz qyzmetin Qazaqstan zańnamasyna saı júzege asyryp keledi. Áýekompanııada monopolııalyq joǵary baǵa belgileý faktilerin anyqtaý úshin júrgizilgen kóptegen tergeý men tekserý tasymaldaýshynyń jumysynan kemshilik tapqan joq. Agenttik júktegen quqyq buzýshylyq tek qana otyn alymyn óndirip alýǵa qatysty jáne negizsiz. Eń aldymen, áýekompanııanyń otyn alymyn alýy - zańdy quqyǵy. Bul «Áýe keńistigin paıdalaný týraly» QR Zańynda qarastyrylǵan. Búgingi tańda atalǵan norma qoldanylady, bul jaıynda agenttiktiń ózi de birneshe márte málimdegen» dep habarlady kompanııanyń baspasóz qyzmeti.
Sonymen qatar, ákimshilik sotta is qaralyp jatqanda kóptegen protsessýaldyq quqyq buzý faktileri bolǵan.
Áýe kompanııasy sot aktisine shaǵym beredi.
«Al agenttik jaýapkershilikke tartý tártibin buzdy, bul Astana qalasy MAÁS-tyń agenttik áreketterin/áreketsizdigin zańsyz dep taný týraly (zańdy kúshine enbegen) sheshimimen rastalady» deıdi Air Astana.