Baǵany baqylaý: Prezıdent deldaldyq shemalardy tergep-tekserýdi tapsyrdy
«Álemdik, ásirese irgeles naryqtardaǵy suranysty, usynysty jáne baǵany boljaý júıesiniń bolýy óte mańyzdy. Qazaqstan, Reseı, Ózbekstan, Qyrǵyzstan arasyndaǵy saýda aǵyndary – tirshiliktiń bir bóligi, olardyń bolýy sózsiz. Sondyqtan aýyl sharýashylyǵy mınıstrliginiń boljamdyq-taldaý apparaty olardyń áserin tolyǵymen eskerýi kerek. Al qazir bul jumystardy kórip otyrǵan joqpyz», - dedi Prezıdent Úkimettiń keńeıtilgen otyrysynda.
Sonymen birge, Q. Toqaev vedomstvoaralyq yntymaqtastyq ta mańyzdy ekenin, negizgi daqyldar men taýarlar boıynsha boljamdyq balanstar ázirlep, áriptestermen aqparat almasý qajettigin aıtty.
«Shamadan tys jáne kóleńkeli deldaldar mańyzdy másele bolyp otyr. Ádil saýda deldaldyǵy – naryqtyq ekonomıkanyń ajyramas jáne qajetti bóligi. Biraq deldaldar naryqty óz yńǵaılaryna «syndyryp», óndirýshiler men tutynýshylar esebinen asa kóp paıda taýyp jatady – buǵan jol berýge bolmaıdy. Kóbinese jergilikti bıliktiń ózi anyqtaı almaıtyn óte turaqty shemalar bolady.
Úkimet Básekelestikti qorǵaý agenttigimen jáne ákimdermen birlesip, óńirlerde osyndaı deldaldyq shemalardy tergep-tekserý jóninde komıssııa qurýy qajet. Bul jumysqa Qarjy monıtorıngi agenttigi de qosylýy tıis. Olar baǵanyń búkil tizbegin tekserip, nátıjelerin baıandaýy kerek. Іri qalalardyń kóterme saýda naryqtaryna erekshe nazar aýdarý kerek», - dep tapsyrma berdi Prezıdent.
Buǵan deıin Qasym-Jomart Toqaev eldegi azyq-túliktiń qymbattaýy jóninde pikir bildirip, pandemııa azyq-túlik qaýipsizdigindegi osaldyqty ashyp kórsetkenin aıtqan edi.