Baǵalanbaı qalǵan batyrlar: Qasym AHMETOV

ASTANA. QazAqparat - Jeńis kúni qarsańynda «QazAqparat» HAA esimi umyt qalǵan Keńes Odaǵynyń Batyrlary týraly materıaldar jarııalaıdy. Materıaldardy jarııalaýǵa «Baǵalanbaı qalǵan batyrlar» jınaǵynyń avtory Berik Ábdiǵalıuly kómek kórsetti.

Berik Ábdiǵalıulynyń atap ótýinshe, bul jınaqta sóz qozǵalatyn batyrlardyń esimi jalpaq jurtqa málim emes. Olardyń atymen atalǵan kóshe nemese mektepter joq. Qan maıdanda erlik kórsetkenin janyndaǵy joldastary kórse de, shtab jáne partııa basshylyǵy olardy moıyndamaǵan. Bizdiń mindetimiz - baǵalanbaı qalǵan batyrlar jaıynda keleshek urpaqqa áńgimelep berý.

Qasym AHMETOV - 1917 jyly Qostanaı oblysy Meńdiqara aýdany Tóleńgit aýylynda dúnıege kelgen. 1939 jyly ásker qataryna shaqyrylyp, Fın soǵysyna,1941 jyldan bastap Uly Otan soǵysyna qatysady. Avtomatshylar vzvodynyń komandıri. І dárejeli Otan soǵysy, Qyzyl Tý, ІІІ dárejeli Dańq ordenderimen marapattalǵan. 244-atqyshtar polkiniń komandıri Q. Ahmetovti kórsetken erligi úshin Keńes odaǵynyń batyry ataǵyna usynady. Biraq belgisiz sebeptermen batyr ataǵy berilmeı qalady. 1945 jyly 16 sáýirde Jeńiske az ǵana ýaqyt qalǵanda Germanııa jerinde qaza tabady.