BAÁ óziniń ǵarysh ortalyǵyn qurdy

ÁBÝ-DABI. QazAqparat - Birikken Arab Ámirliginiń vıtse-prezıdenti jáne premer-mınıstri, Dýbaı ámirliginiń basqarýshysy Muhammed bın Rashıd ál Maktým Ámirlikterdiń qazirgi zamanǵy ǵylym jáne tehnologııalar uıymy bazasynda ulttyq ǵarysh ortalyǵyn qurý týraly ókim shyǵardy.

Jergilikti WAM agenttiginiń habarlaýynsha, bul ortalyq ǵarysh salasyndaǵy jobalardy damytýmen jáne zertteýler júrgizýmen aınalysyp, BÁA-niń atalmysh salada kóshbasshylyq rólge ıe bolýǵa degen talpynystaryn bildirmek. Sondaı-aq ortalyqta Marsqa ushqyshsyz ushyrylatyn apparatty ushyrýǵa daıyndaýdyń barlyq kezeńderi júzege asyrylady.

Atalmysh ǵarysh ortalyǵynda jer serikterin ushyrý jáne olarǵa qyzmet kórsetý boıynsha kez kelgen ǵylymı jumystar men BAÁ úkimetiniń keıbir jobalary júrgiziletin bolady.