BAÁ-ge organıkalyq ónimderdi jetkizýde Qazaqstannyń áleýeti zor – Memleket basshysy

ÁBÝ-DABI. QazAqparat – Qazaqstan men Birikken Arab Ámirlikteriniń aýyl sharýashylyǵy salasyndaǵy yntymaqtastyǵynyń áleýeti joǵary. BAÁ bıznes ókilderimen kezdesýde Qazaqstan Prezıdenti Qasym-Jomart Toqaev osylaı dedi, dep habarlaıdy QazAqparat tilshisi.

«Aýyl sharýashylyǵy salasyndaǵy yntymaqtastyqty nyǵaıtýda bizde zor áleýet bar. BAÁ barlyq azyq-túlik tutynýdyń 85 paıyzyn ımporttaıtynyn bilemiz. Jaqynda dúnıejúzilik azyq-túlik qaýipsizdigin qamtamasyz etý úshin «Azyq-túlik qaýipsizdigi jónindegi ulttyq strategııa» qabyldanǵanyn bilemiz», - dedi Qasym-Jomart Toqaev.

Memleket basshysy osy strategııa aıasynda agroónerkásip keshenindegi saýdany jáne tamaq ónimderin óndirý tehnologııalaryn damytý - mańyzdy baǵyttardyń biri ekenin atap ótti.

«Osy turǵydan qaraǵanda Qazaqstannyń Ámirlikterge organıkalyq jáne sapaly ónimderdi jetkizýde aýmaqtyq, tehnologııalyq jáne logıstıkalyq áleýeti bar. Osy ónimderdi BAÁ-ge tasymaldaý úshin biz Ámirlikterdi Qazaqstannyń tamaq ónimderin óndirý salasyna qarjy salýǵa shaqyramyz. Ámirlikterde azyq-túlik tutyný deńgeıiniń 12 paıyzǵa artqanyn eskere otyryp, bizdiń úkimetimiz ben kompanııalarymyz Qazaqstannan uzaqmerzimdi azyq-túlik tasymalyn uıymdastyrýdy oılastyryp jatyr. Bizde úlken áleýet pen múmkindikter bar», - dep qorytyndylady Qazaqstan Prezıdenti.