BAÁ-de jazasyn ótep jatqan 6 qazaqstandyq elge qaıtarylýy múmkin

NUR-SULTAN. QazAqparat – Parlament Senatynda Qazaqstan men Birikken Arab Ámirlikteri arasynda sottalǵan adamdardy berý shartyn ratıfıkatsııalaý týraly zań jobasy qaraldy, dep habarlaıdy QazAqparat tilshisi.

«Osy shartpen eki eldiń arasyndaǵy tolyq kelisimder jınaǵy jasalyp otyr. Qazir eki eldiń ózara qarym-qatynasy jaqsy. Aramyzda vıza joq. Saýda, týrızm, ınvestıtsııa tartý artyp keledi. Jyl saıyn kóshi-qon sany ósip jatyr», - dedi Senat otyrysynda zań jobasyn oqyǵan Bas prokýrordyń orynbasary Marat Ahmetjanov.

Onyń aıtýynsha, Birikken Arab Ámirlikterindegi jekelegen qylmys túrleri Qazaqstan zańdarynda joq.

«Mysaly olardyń Oraza buzý, qoǵamdyq jerde ishimdik ishý, nekesiz jynystyq qatynasqa túsý qylmys bolyp sanalady. Biraq eki eldiń zańy boıynsha negizgi qylmys pen jaza túrleri uqsas. Jalpy biz basqa elde qylmystyq jaýapkershilikke tartylǵan azamattarǵa qol sozýymyz kerek. Sebebi memleket úshin sheteldegi azamattardy qorǵaý – Konstıtýtsııa júktegen mindet. Sondyqtan qylmys jasady dep aıyptalǵan azamattardan bas tartpaımyz», - dedi ol.

Marat Ahmetjanov bul sharttyń maqsaty – sottalǵandardy jazasyn elinde óteýge jaǵdaı jasaý ekenin aıtyp ótti.

«Qujatty sottalǵan adamdy berý men odan bas tartý jaǵdaılary naqty kórsetilgen. Qazirgi ýaqytta bizdiń alty qazaqstandyq Birikken Arab Ámirlikterinde jazasyn ótep jatyr. Shart kúshine enggen soń ony elge qaıtarýǵa múmkindik týady. Qazaqstanda sottalǵan BAÁ azamattary joq», - dedi ol.