BAÁ bıligi turǵyndardy velosıpedke otyrǵyzbaq
Kólik ınfraqurylymyn aýqymdy jańǵyrtý josparynda júzdegen shaqyrym velosıped joldaryn, olardyń turaqtary men mamandandyrylǵan prokat beketterin, sondaı-aq servıs-ortalyqtaryn salýdy kózdeıdi.
Gulf News gazetiniń habarlaýynsha, on jyldan keıin BAÁ turǵyndary men qonaqtary ózderiniń mashınalaryn turaqtarǵa qoıyp, qala ishinde velosıpedpen ǵana júretin bolady.
Gazettiń málimetterine qaraǵanda, velosıpedshiler úshin basty problema olardyń qozǵalysy úshin arnaıy joldardyń bolmaýy. Sondyqtan da jergilikti ókimet oryndary iri qalalardy aýdandarǵa bólip, árqaısysynda velosıped ınfraqurylymyn jasaqtaýdy qolǵa aldy. Olar bara-bara bir-birimen qosylyp, iri qoǵamdyq kólik toraptaryna shyǵatyn bolady.
Velosıped mádenıetin damytýda burynǵysha Dýbaı qalasy kósh bastap otyr, dep jazady Gulf News. Qalada qazirdiń ózinde ekidóńgelekti kólik úshin 100 shaqyrymdyq jol paıdalanýǵa berildi. 2030 jylǵa deıin olardyń uzyndyǵy 850 shaqyrymǵa jetpekshi. Sonymen qatar, metro stansalaryna deıin velosıped úshin 1400 arnaıy jol tartylady. Árbir osyndaı kólik toraby mamandandyrylǵan turaqtarmen jabdyqtalady.
Basylym sarapshylary ámirlik turǵyndarynyń velosıpedke zeıini aýýynyń buryn-sońdy bolmaǵan ósimin bul kólikti demalys túri retinde qarastyratynyn da atap ótken. Memleket turǵyndardyń salaýatty ómir saltyna umtylysyn yntalandyra otyryp, ınfraqurylym qurýǵa mıllardtaǵan dollar ınvestıtsııa salýǵa ázir. Bılik oryndary vedosıpedtiń demalys túri bolýymen qatar bolashaqta onyń keńinen taraǵan qozǵalys quraly bolatynyna úmitti. Sonymen birge bul qalalyq kólik ınfraqurylymyn jeńildetip, eldegi ekologııalyq jaǵdaıdy jaqsarta túsýge de septigin tıgizetin bolady.