BAÁ balaly otbasylarǵa birneshe rettik týrıstik vıza rejımin engizdi

ASTANA. QazAqparat – Birikken Arab Ámirlikteri 18 jasqa tolmaǵan balalary bar otbasylarǵa elge birneshe ret kirýge múmkindik beretin 5 jyldyq týrıstik vıza rásimdeýge ruqsat berdi, dep habarlaıdy QazAqparat tilshisi.

BAÁ sáıkestendirý, azamattyq, kedendik jáne porttyq qaýipsizdik jónindegi federaldy basqarmasynyń (ICP) málimetteri boıynsha vıza alý úshin demeýshilik kepildik suralmaıdy.

Basqarma dereginshe, vıza ıesiniń 1 jyl ishinde elde bolý ýaqyty 90 kúnnen aspaýy tıis. Onyń merzimi aıaqtalǵan jaǵdaıda bir ret taǵy da 3 aıǵa sozdyrtýǵa bolady. ıAǵnı, eń uzaq merzim - 6 aı.

Bul rette, elde bolý merzimin ózgertý úshin keler jyldy kútpeısiz. Sebebi onyń ýaqyty vıza berilgen kúnnen bastap esepteledi. Eger azamat 1 jyl ishinde BAÁ-de 90 kúnnen az bolsa, artyq kúnderi kelesi jylǵa qaldyrylmaıdy.

Vıza alý úshin qoıylatyn talaptar:

- 6 aı ishinde jasalǵan bank operatsııalarynyń kóshirmesi;

- azamattyń bank shotynda keminde 4 myń dollar bolýy tıis;

- BAÁ-de medıtsınalyq saqtandyrýdy 180 kúnge rásimdeý qajet;

- vıza berilgen kúnnen bastap 60 kún ishinde BAÁ-ge barý qajet. Eger bul ýaqyttan keshikken jaǵdaıda qujattyń kúshi joıylady.

Otbasylyq vızaǵa ótinishti tek 18 jasqa deıingi balalary bar otbasylar bere alady. Búldirshinderdiń ata-analary barlyq talapty saqtaı otyryp, quzyrly organǵa óz betinshe ótinish joldaýy tıis.