B.Jumaǵulov: 2015 jylǵa qaraı stýdentterdiń 80 paıyzy jataqhanamen qamtamasyz etiletin bolady

ASTANA. 31 qańtar. QazAqparat /Jasulan Joldybaev/ - 2015 jylǵa qaraı stýdentterdiń 80 paıyzy jataqhanamen qamtamasyz etiledi.

Bul týraly búgin Bilim jáne ǵylym mınıstrliginiń keńeıtilgen alqa májilisinde vedomstvo basshysy Baqytjan Jumaǵulov aıtty.

«Ótken jyly Elbasynyń tapsyrmasyna sáıkes «Stýdenttik baspana» baǵdarlamasynyń jobasy ázirlendi. Ol 2015 jylǵa qaraı stýdentterdiń 80 paıyzyn jataqhanamen qamtamasyz etýge múmkindik beredi», - dedi mınıstr.  

B. Jumaǵulovtyń aıtýynsha, 2011 jyly jańadan 2 stýdenttik jataqhana salyndy, 5-eýi kúrdeli jóndeýden ótti. Bıyl taǵy úsh jataqhana paıdalanýǵa berilip, 8 nysan kúrdeli jóndeýden ótedi dep josparlanýda.

«Bıýdjetti naqtylaý boıynsha taǵy 7 jataqhana salýǵa ótinim beretin bolamyz. Sonymen qatar kesteni tolyq qarap, 2015 jylǵa deıin jańa nysandardy engizýimiz qajet», - dep naqtylady vedomstvo basshysy.