B.Sultanov: Zańdastyrylatyn sýbektiler qylmystyq jáne ákimshilik jaýaptylyqtan bosatylady
«Ulttyq bankke Úkimetpen birlesip, kapıtalǵa raqymshylyq jasaý týraly zań jobasyn 1 maýsymǵa deıin ázirlep, meniń qaraýyma engizýdi tapsyramyn», - degen bolatyn Memleket basshysy.
Osy joly Ult kóshbasshysynyń bul tapsyrmasyn buljytpaı oryndaǵan Ulttyq bank tipti merziminen buryn Zań jobasyn Úkimet qaraýyna engizip, Mınıstrler kabınetiniń maquldaýyn da alyp úlgerdi. Ony búgin QR Prezıdenti janyndaǵy ortalyq kommýnıkatsııalar qyzmetinde ótken brıfıngte QR Premer-Mınıstriniń orynbasary - Qarjy mınıstri Baqyt Sultanov aıtty. «Búgin Úkimet otyrysynda «Múlikti zańdastyrýǵa baılanysty Qazaqstan Respýblıkasynyń azamattaryna, oralmandarǵa jáne turýǵa ruqsaty bar tulǵalarǵa raqymshylyq jasaý týraly» Zań jobasy maquldandy», - dedi ol.
B.Sultanovtyń atap ótýinshe, zań jobasynda múlikti jarııa etýdiń negizgi qaǵıdalary aıqyndalǵan. Atap aıtqanda, birinshiden, jarııa etý eldiń ekonomıkasyna qosymsha qarjy qarajatyn jáne múlikti tartý maqsatynda júrgiziledi. Ekinshiden, jarııa etilgen aqsha men múlik salyq salý maqsatynda tabys retinde tanylmaıdy jáne tıisinshe jeke tabys salyǵy salynbaıdy. Іlespeli zań jobasymen QR-nyń Salyq kodeksine tıisti tolyqtyrýlar engiziledi.
«Úshinshiden, jarııa etý bastalǵanǵa deıin alǵan múlik jatady. Tórtinshiden, jarııa etý sýbektileri birqatar baptar boıynsha qylmystyq jáne ákimshilik jaýaptylyqtan bosatylady», dedi B.Sultanov.
Onyń aıtýynsha, qabyldanǵan qujatqa sáıkes zańdastyrýǵa aqsha, qundy qaǵazdar jáne zańdy tulǵalardyń jarǵylyq kapıtalyna qatysý úlesi jatady. Budan bólek qurylys normalary men erejelerine sáıkes ornalasqan qurylys nysany da jer telimimen qosa zańdastyrylady. Qazaqstan aýmaǵynan tysqary jerdegi jyljymaıtyn múlikti de óz atyńa aýdarýǵa múmkinshilik bar. Al adamnyń konstıtýtsııalyq jáne basqa da quqyqtary men bostandyqtaryna, memlekettik konstıtýtsııalyq qurylymy men qaýipsizdigine qarsy jasalǵan jekelegen qylmystar nátıjesinde alynǵan múlikter zańdastyrylmaıdy.
«Usynylyp otyrǵan zańdastyrý protsedýrasy boıynsha aqsha ekinshi deńgeıli bankterde ashylǵan arnaıy jınaq esepshotyna aýdarylady. Odan ary azamat zańdastyrý tetikterin óz erkimen tańdaı alady», - dedi B.Sultanov.
Qarjy mınıstri zańdastyrý tetikterin de naqty atap berdi. Onyń sózine qaraǵanda, birinshiden, aqshany 5 jyl ishinde ekinshi deńgeıli bankterdiń esepshottarynda ustaýǵa bolady. Bul rette qarjysyn zańdastyratyn salymshy naryqtyq stavkaǵa sáıkes syıaqy alyp otyrady. Ekinshiden, aqshany merziminen buryn paıdalanǵysy kelse, ony ekonomıkaǵa memlekettik baǵaly qaǵazdardy ekinshi deńgeıli bankterdiń, ulttyq basqarýshy holdıngter men kompanııalardyń, damý ınstıtýttarynyń oblıgatsııalaryn men «Halyqtyq ІRO» baǵdarlamasynyń aıasynda aktsııalardy, sonymen birge Qazaqstan qor bırjasynda ornalastyrylatyn ózge de baǵaly qaǵazdardy satyp alý jolymen ınvestıtsııa jasaýlaryna bolady. Úshinshiden, azamattar jekeshelendirýdiń ekinshi tolqyny aıasynda nysandardy satyp ala alady.
«Eger aqshasyn zańdastyratyn azamat joǵaryda atalǵan ınvestıtsııalaý tetikterin paıdalanǵysy kelmese, onda ol óz qarjysyn qalaýynsha paıdalana alady. Ekinshi deńgeıli bankter oǵan atalǵan aqshany tóleý barysynda zańdastyrylatyn aqshasynan 10 paıyz kóleminde alym ustap qalady», - dedi mınıstr.
Sóz sońynda ol múlikti zańdastyrý ákimdikter janyndaǵy komıssııada júrgiziletindigin, al zańdastyrý merzimi aǵymdaǵy jyldyń 1 qyrkúıeginen 2015 jyldyń 31 jeltoqsanyna deıin jalǵasatynyn basa aıtty.