B.Saparbaev Túrkistandaǵy Qazaq handyǵynyń 550 jyldyǵyna arnalǵan halyqaralyq konferentsııa jumysyna qatysty (FOTO)

ASTANA. QazAqparat - Búgin Túrkistanda QR Premer-Mınıstriniń orynbasary Berdibek Saparbaev Ońtústik Qazaqstan oblysy boıynsha jumys saparyn jalǵady, dep habarlaıdy www.primeminister.kz.

Vıtse-premer Túrkistannyń áleýmettik salasynyń damýymen tanysyp, qalalyq aýrýhanany, mektep-gımnazııany, MJS jaǵdaıynda salynǵan túrki tildes halyqtardyń jeke kitaphanasy men balabaqshany aralady.

Premer-Mınıstrdiń orynbasary sondaı-aq qazirgi tańda ıAssaýı atyndaǵy halyqaralyq qazaq-túrik ýnıversıtetinde ótip jatqan «Qazaq memlekettiligi tarıhyndaǵy Qazaq handyǵynyń róli men mańyzy» atty ǵylymı-teorııalyq konferentsııa jumysyna qatysty.

B.Saparbaev elimizdiń Prezıdenti N.Nazarbaevtyń konferentsııa qatysýshylaryna joldaǵan quttyqtaý sózin oqyp berdi.

«Memleket tarıhyndaǵy aıtýly kezeń - Qazaq handyǵynyń 550 jyldyǵy Otanymyzdyń túkpir-túkpirinde atap ótiledi. Qazaq handyǵynyń qalyptasýyna arnalǵan ǵylymı is-sharalar memleket shekarasynan asyp, shetelderde de ótkizilýde», - dep jazylǵan quttyqtaý sózde.

«Sońǵy birneshe jylda respýblıkada «Tarıh aǵynyndaǵy halyq» memlekettik baǵdarlamasynyń arqasynda Qazaq handyǵyn jan-jaqty zertteý boıynsha jumys júrgizildi. Onyń ishinde Qazaq handyǵynyń qurylýynan bastaý alǵyp, «Máńgilik el» ıdeıasynyń negizi bolǵan memlekettilik ıdeıalar zertteldi. Osynyń bári qazirgi jáne bolashaq urpaqtyń júrekterinde qazaqstandyq patrıottyqtyń, Otanǵa degen súıispenshiliktiń paıda bolýyna dálel bolyp tabylady.

Búgingi tańda Túrkistan ultymyzdyń maqtanyshyna, ata-babalarymyzdyń rýhynyń qasıetti mekenine aınaldy. Oǵan qosa, bul ejelgi qala barlyq zamanaýı túrki áleminiń halyqaralyq ǵylymı ortalyǵy, atap aıtqanda, qazaq halqynyń tarıhyn, onyń salt-dástúrin zertteıtin ǵylymı ortalyq sanalady», - delingen quttyqtaý sózde.

Konferentsııa qatysýshylaryna qarata sóılegen sózinde B.Saparbaev Elbasynyń saıasatynyń arqasynda «Qazaqstan erkin jáne egemendi memleketke, álemdik qaýymdastyqtyń tolyqqandy múshesine aınalǵanyn» basa aıtty.

«Osy turǵyda Qazaq handyǵynyń 550 jyldyǵyn merekeleý, Elbasy aıtqandaı, bul tarıhı sabaqtastyqtyń, bir shańyraqtyń astynda kelisim men beıbitshilikte turyp jatqan barlyq qazaqstandyqtardyń birliginiń kórinisi», - dep atap ótti vıtse-premer.

Konferentsııaǵa Túrkııa, Iran, Ázirbaıjan, Koreıa, Reseı, Ózbekstan, Qyrǵyzstan jáne Qazaqstannyń ǵylymı qoǵamdastyǵynyń 600-den astam ókili qatysty.