B.Saparbaev «Bolashaq» baǵdarlamasynyń stıpendıaty atanǵandarǵa sertıfıkattar tabystady
15:22, 20 Sáýir 2015
ASTANA. QazAqparat - Búgin Astanada jas mamandar forýmynda Premer-Mınıstrdiń orynbasary Berdibek Saparbaev «Bolashaq» stıpendııasynyń qataryn jaqynda ǵana tolyqtyrǵan jastarǵa sertıfıkattar tabystady.
«Bolashaq» baǵdarlamasy Elbasynyń bastamasymen 1993 jyly qurylǵanyn eske salyp ótken vıtse-premer: «Ol álemniń jetekshi joǵary oqý oryndarynda kadrlardy daıarlaý jónindegi birinshi baǵdarlama boldy. Óz kezeginde baǵdarlama 8 myńǵa jýyq bilikti mamandardy daıarlaýǵa múmkindik berdi», - dedi.
Sonymen qatar Bilim jáne ǵylym mınıstri Aslan Sárinjipov halyqaralyq jáne respýblıkalyq olımpıadalardyń jeńimpazdaryna estelik syılyqtardy tabys etti.
Aıta keteıik, forýmǵa 400-den astam «Bolashaq» prezıdenttik baǵdarlamasynyń túlekteri, «Daryn» jáne «Jas tulpar» jastar syılyqtarynyń laýreattary, sondaı-aq halyqaralyq olımpıadalardyń jeńimpazdary qatysty.