B.Saparbaev aqtóbelikterge saılaýǵa belsendi qatysqandary úshin alǵys bildirdi (FOTO)
Óńir basshysy Qazaqstannyń odan ári tabysty damýy úshin ótken saılaýdyń mańyzdylyǵyna toqtalyp, saılaý naýqanyna belsendi qatysqany úshin alǵysyn jetkizdi.
«Qazaqstandyqtar taǵy da eldiń turaqtylyǵyn, beıbitshiligin, damýyn tańdaıtyndyǵyn, óz memleketiniń, ult kóshbasshysynyń jáne «Nur Otan» partııasynyń saıasatyn qoldaıtyndyǵyn pash etti. Nashar aýa raıyna qaramastan, barlyq aqtóbelikterdiń arqasynda biz saılaýǵa belsendi qatystyq. Ortalyq saılaý komıssııasynyń málimetterine sáıkes saılaýǵa Aqtóbe oblysy turǵyndarynyń 80 paıyzdan astamy qatysty. Egerde biz kúni keshegi birligimizdi saqtap, baǵalaı alatyn bolsaq, onda barlyq qıyndyqtardy eńserip, gúldengen, básekege qabiletti Qazaqstandy qalyptastyramyz, - dedi B.Saparbaev.
Sondaı-aq Aqtóbe oblysynyń basshysy óńirdiń barlyq turǵyndaryn Naýryz merekesimen quttyqtap, tabys, qýanysh, baq-bereke tiledi.
Forým barysynda Memleket basshysy N.Á.Nazarbaevtyń Jalpyǵa Ortaq Eńbek Qoǵamy ıdeıasyn júzege asyrýǵa tynbaı úles qosyp júrgen eńbekkerler de sóz sóıledi.
«Partııa bul saılaýda senimdi túrde jeńiske jetti. Óıtkeni bul halyqtyń, eńbek adamdarynyń partııasy. Biz, óndiris ónerkásibi qyzmetkerleri, óz daýysymyzdy «Nur Otanǵa» berdik. Sebebi bizdiń barlyǵymyz úshin de turaqty jumys pen ál-aýqat barynsha mańyzdy. «Nur Otannyń» jeńisi - bul bizdiń erteńgi kúnge degen senimimiz», - dedi Aqtóbe hrom qospalary zaýytynyń tseh bastyǵy Maksım Mozgovyh.
Al Aqtóbe oblystyq aýrýhanasynyń bólimshe meńgerýshisi Aıgúl Eserǵojına óz tańdaýyn memlekettegi turaqtylyq pen beıbitshilik úshin jasaǵandyǵyn atap ótti.
«20 naýryz kúni men óz daýysymy «Nur Otan» partııasyna berdim. Meniń tańdaýym tosynnan emes. 1991 jyly táýelsizdiktiń eleń-alańynda men Tájikstannan ózimniń tarıhı otanyma qonys aýdardym. Dál osy Qazaqstanda joǵary medıtsınalyq bilim alyp, dáriger retinde qalyptastym, - dedi A.Eserǵojına.