B. Baıbek: Almaty servıstik qaladan ınnovatsııalyq smart-sıtıge aınalady

ALMATY. QazAqparat - Ońtústik astanada «Almaty - ómir súrýge jáne bızneske qolaıly qala» 5-shi ınnovatsııalyq forýmy ótip jatyr. Sharanyń basty uıymdastyrýshylary - Almaty ákimdigi men «Innovatsııalyq tehnologııalar parki» avtonomııalyq klasterlik qory.

Forýmǵa Almaty qalasynyń ákimi Baýyrjan Baıbek, «Baıterek» UBH» AQ basqarma tóraǵasy Erbolat Dosaev, «Kazkommertsbank» AQ Dırektorlar keńesiniń tóraǵasy Keńes Raqyshev, sondaı-aq,  Reseı, Izraıl, Ońtústik Koreıa, AQSh, Meksıka, Germanııa jáne basqa da elderden kelgen sarapshylar, bıznes qaýymdastyq, memlekettik organ ókilderi, startap jasaýshylar jáne bolashaqty boljaıtyn fýtýrologtar qatysýda.  

Óziniń kirispe sózinde B. Baıbek qazaqstandyq ónertapqyshtardyń 84 paıyzy Almatyda turatyndyǵyn atap ótti.

«Búgingi tańda 10 almatylyqtyń altaýy shaǵyn jáne orta bıznes salasynda jumys isteıdi. 2015 jyldyń qorytyndysy boıynsha Jalpy óńirlik ónimniń somasy 39 mlrd dollardan asty. 

Mysaly, Almaty qalasynyń Jalpy óńirlik ónimi Serbııanyń Jalpy óńirlik óniminen joǵary, sondaı-aq, Mońǵolııanyń JÓÓ-nen 3,5 ese, Qyrǵyzstannyń JJÓ-nen 6 ese joǵary.  

Almatyda 1,7 mln adam tirkelgen. Biraq, bizdiń derek boıynsha olardyń qataryna taǵy 500 myń adamdy qosýǵa bolady. Al Almatyǵa irgeles eldimekenderde, ıaǵnı aglomeratsııada - 3 mln adam turady. Almatylyqtardyń ómir súrý deńgeıi orta eseppen elimizdiń basqa óńirlerinen - 2,2 esege joǵary. Qalanyń damýyna ásirese kásipkerler qomaqty úles qosýda», - dedi qala basshysy.

Sonymen qatar, B. Baıbek, búginde Almatyny servıstik qaladan ınnovatsııalyq smart-sıtıge aınaldyrý jaǵyna basymdyq berilip jatqandyǵyn jetkizdi.

«Álemde kóptegen qalalar osy smart-sıtı dárejesine kóterilip jatyr. Biz, de osy dárejege jetý úshin júıeli turǵyda áreket jasap jatyrmyz. Bul úshin Almatyda ınnovatsııalyq kapıtal men adam kapıtaly bar», - dedi B. Baıbek.   

Degenmen, ákimniń aıtýynsha, qalanyń áleýeti áli de jetkilikti deńgeıde qoldanylmaı keledi. 

«Bul jerde qalanyń ınnovatsııalyq áleýeti pen ınnovatsııalyq ortasyn damytý - Almatyny ınnovatsııa jáne tehnologııa ortalyǵyna aınaldyrýda mańyzdy strategııa bolyp tabylady. Basty mindet - ınnovatsııalyq ekologııalyq júıeni qurý. Qala, ınnovatsııalyq qalaǵa aınalýy úshin kapıtal men ıdeıalar qajet.  Al olar bizde bar. Endi bul iske jańashyl azamattar men myqty kompanııalardy tartýymyz qajet», - dedi ákim.