Azyq-túlikti ysyrap qylǵan korporatsııa basshysy qyzmetinen bosatyldy
Oblys ákimi Nurlybek Nálibaevtyń tóraǵalyǵymen ótken májiliste azyq-túlik ysyrabyna jol bergen korporatsııanyń jumysyna tıisti baǵa berildi.
Eske salsaq, 26 mamyr kúni áleýmettik jelide qoqys polıgonyna tógilgen jaramsyz kókónis qaldyqtary týraly beınejazba tarady. «Baıqońyr áleýmettik-kásipkerlik korporatsııasy» aktsıonerlik qoǵamy qaldyqtar 25 mamyr kúni joıylǵanyn rastaǵan bolatyn. Muny «azyq-túlik saqtalǵanda óz salmaǵyn joǵaltady, ol tabıǵı ózin-ózi joǵaltý dep esepteledi» dep túsindirdi.
Aımaq basshysy bul korporatsııa basshysynyń qateligi ekenin, ysyraptyń aldyn alýǵa bolatynyn aıtty.
«Samat Nurahmetuly, shynynda, bul áreket turǵyndardyń ashý-yzasyn týǵyzdy. Máseleniń burynnan bar ekenin bile tura, mamandaryńyzben birge qoımadaǵy ónimderdi basqa maqsatqa paıdalaný joldaryn qarastyrý kerek edi. Bul jumys ta jasalmaǵan. 126 tonna ónim jaramsyz bolǵansha shirigenin kútip, ony paıdaǵa asyrýdyń balama joldaryn izdemegensizder. Bul sizdiń basshy retinde jumysty tıisti deńgeıde úılestire almaǵandyǵyńyzdy kórsetedi. Elge janashyrlyq tanyta almaıtyn adamdarǵa bizdiń aramyzda oryn joq», – dedi Nurlybek Mashbekuly.
Osy jaǵdaıdan keıin «Baıqońyr» ÁKK» AQ basqarma tóraǵasy Samat Ernııazov qyzmetinen bosatylyp, oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaevqa qatań sógis jarııalandy.
«Bıylǵy jyly kókónis aldyńǵy jylǵa qaraǵanda 3 ese artyq satyp alynǵanymen (1547,1 tonn), joıý kórsetkishi 3 ese az, ıaǵnı 9,2%-dy qurap otyr. Ol alynǵan ónimniń sapasyn qadalanǵannyń talapqa sáıkes saqtalǵanynyń nátıjesi», - dedi Talǵat Dúısebaev.
Atalǵan oqıǵa boıynsha arnaıy komıssııa qurylyp, mán-jaıy muqııat tekserilmek. Aldaǵy ýaqytta mundaı jaǵdaı qaıtalanbas úshin tıisti usynystar ázirlenýi kerek.
Aıta keteıik, Qazaqstan Respýblıkasy Úkimetiniń qaýlysyna sáıkes azyq-túlik taýarlarynyń tizbesine áleýmettik mańyzy bar 19 túrli taýar engizilgen. 2023 jylǵy kúzgi ónimnen 3 453,3 tonna aýyl sharýashylyǵy ónimderin aldyn ala aqy tóleý shartymen forvardtyq satyp alý kólemi belgilenip, turaqtandyrý qoryn tolyqtyrýǵa 901,6 mln. teńge baǵyttaldy.