Azyq-túlikti shekti baǵadan asyryp satqandarǵa 530 myń teńgege deıin aıyppul salynady

NUR-SULTAN. QazAqparat - Elordada azyq-túlikti shekti baǵadan asyryp satqandarǵa 530 myń teńgege deıin aıyppul salynady. Bul týraly Ortalyq kommýnıkatsııalar qyzmetindegi brıfıngte Nur-Sultan qalasynyń ınvestıtsııalar jáne kásipkerlikti damytý basqarmasy basshysy Erlan Bekmyrzaev aıtty, dep habarlaıdy QazAqparat tilshisi.

«Qalada un jetkilikti. Osyǵan baılanysty 1 surypty nannyń baǵasy shamamen 90-95 teńgeden aspaıtyn bolady. Qant baǵasyn turaqtandyrý maqsatynda áleýmettik-kásipkerlik korporatsııa arqyly taýarlyq ınterventsııalar júrgizilip jatyr. Áleýmettik azyq-túlik taýarlarynyń baǵasyn retteý maqsatynda Úkimet tarapynan 9 taýarǵa baǵa belgilendi. Baǵa ár aımaqqa jeke bekitildi. Bekitilgen baǵalar e-gov resmı saıtynda ornalastyrylǵan», - dedi basqarma basshysy.

Onyń atap ótýinshe, ákimdikterdiń, monopolııaǵa qarsy qyzmettiń, prokýratýra qyzmetkerleriniń, eriktilerdiń kómegimen qalanyń saýda núktelerinde tekserý júrgizilip jatyr.

Osy múmkindikti paıdalanyp, barlyq kásipkerlerge baǵalar mólsherin qatań saqtaýdy jáne taǵy bir márte osy máselege basa nazar aýdarýdy ótinemin. Bekitilgen baǵadan ósirip jibergen kásipkerlerge sharalar qoldanylady. Ruqsat berilgen bólshek baǵadan asyrǵandar úshin 265 myńnan 530 myńǵa deıin aıyppul salynady«, - dedi Erlan Bekmyrzaev.