Azyq-túlik taýarynyń óndirisi 7 mlrd dollarǵa jetetini boljanady – mınıstr

ASTANA. QazAqparat – Turaqsyz geosaıası jaǵdaı álemniń kóptegen elderiniń azyq-túlik qaýipsizdigi sektoryndaǵy osal tustaryn kórsetti. Astana halyqaralyq forýmy sheńberinde ótip jatqan paneldik sessııaǵa qatysqan Aýyl sharýashylyǵy mınıstri Erbol Qarashókeev osylaı málim etti, dep habarlaıdy QazAqparat tilshisi.

«Turaqsyz geosaıası jaǵdaı álemniń kóptegen elderiniń azyq-túlik qaýipsizdigi sektoryndaǵy osal tustaryn kórsetti. Pandemııaǵa baılanysty memleketter engizgen shekteý saldarynan tasymaldaý marshrýttary buzyldy, azyq-túlikke degen suranys kúrt artty. Jetkizýdegi qıyndyqtarǵa baılanysty aýyl sharýashylyǵy úshin qajetti ónimderdiń baǵasy ósti. Ol ásirese otandyq taýar óndirýshilerge qatty áser etti. Ózderińiz biletindeı, Qazaqstan ashyq naryqtyq ekonomıkany ustanady. Sondyqtan álemde, kórshi memleketterde bolyp jatqan máselelerdiń bizge de áser etpeýi múmkin emes», - dedi Erbol Qarashókeev.

Mınıstr bul túıitkilderdi sheshý úshin Úkimet tarapynan jasalǵan qoldaý sharalaryna da toqtaldy. Onyń aıtýynsha, bıyl Qazaqstanda kóktemgi egis jumystaryna baǵyttalǵan qarjy kólemi 2 ese ulǵaıdy.

«Pandemııa saldary men geosaıası jaǵdaılarǵa qaramastan, azyq-túlik taýarlaryn óndirý sektory 4% artyp, 6,5 mlrd dollarǵa jetti. Keler jyly onyń kólemi 500 mıllıonǵa ulǵaıyp, jalpy 7 mlrd dollar bolady dep boljam jasap otyrmyz. ıAǵnı, jyl saıynǵy ortasha ósim 5-6% tóńireginde bolady», - dep kútiletin nátıjelermen bólisti vedomstvo basshysy.