Azyq-túlik taýarynyń 29 túrine turaqty monıtorıng júrgizilýde - mınıstr

NUR-SULTAN. QazAqparat – Aýyl sharýashylyǵy mınıstri Saparhan Omarov qaı ónimder ımporttalatynyn aıtty, dep habarlaıdy QazAqparat tilshisi.

«Mınıstrlik negizgi azyq-túlik taýarlarynyń 29 túri boıynsha turaqty túrde monıtorıng júrgizedi. Bul tizbeni shartty túrde úsh topqa bólýge bolady. Birinshi top – qamtamasyz etilýi 100 jáne odan da kóp paıyzdy quraıtyn azyq-túlik taýarlary (taýyq jumyrtqasy, kúrish, qoı eti, kartop, un, makaron jáne t.b.). Otandyq óndirýshilerdiń óndiris kólemi jetkilikti bolǵandyqtan, bularǵa basymdyq berilmeıdi», - dedi mınıstr Parlament Májilisindegi Úkimet saǵatynda.

Onyń sózine qaraǵanda, ekinshi top – qamtamasyz etilýi 90 jáne odan asatyn paıyzdy quraıtyn ónim túrleri. Bular – maýsymǵa táýeldi bolatyn kókónis ónimderi (qyzanaq, qııar, qyryqqabat, sábiz, basty pııaz, burysh), sıyr eti, shoshqa eti, jylqy eti, qyshqyl sút ónimderi, sary maı jáne kúnbaǵys maıy. Kórsetilgen ónimderdi jetkilikti kólemde óndiremiz, sonymen birge az kólemde ımport ta bar.

«Úshinshi top – qamtamasyz etilýi 80 paıyzdan tómen ónim túrleri. Bular – qus eti, shujyq ónimderi, irimshik pen súzbe, balyq, alma men qant. Bul taýarlyq pozıtsııalar boıynsha ımport jyl saıyn 580,7 mln dollardy nemese 220 mlrd teńgeni quraıdy. Olar ekzotıkalyq taýarlar emes. Bular óz elimizde óndiriletin jáne 2024 jylǵa qaraı óz-ózimizdi qamtamasyz etý deńgeıine jetkizýge bolatyn taýarlar. Atalǵan mindetter sala aldyna qoıyldy, sondaı-aq Nur Otan partııasynyń saılaýaldy tuǵyrnamasynda da kórinis tapty», - dedi Saparhan Omarov.

Osy oraıda ol mınıstrlik sút, qus etin, alma men qant óndirý kólemin ulǵaıtýdy kózdeıtin salalyq baǵdarlamalar ázirlegenin eske saldy.