Azyq-túlik sapasyn agralyq ǵylymdy damytý arqyly qamtamasyz etý kerek – Úkimet basshysy

NUR-SULTAN. QazAqparat – Baǵany ákimshilik mehanızmdermen ustap turýdan basqa ádisterin qoldaný qajet. Úkimet otyrysynda QR Premer-Mınıstri Álıhan Smaıylov tıisti sala basshylaryna osyndaı tapsyrma júktedi, dep habarlaıdy QazAqparat tilshisi.

«Baǵalardy ákimshilik mehanızmdermen ustap turý naryqtyq tásilderge jatpaıtynyn bilemiz. Sondyqtan baǵalardy turaqtandyrýdyń basqa da ádisterin qoldaný qajet.

Sonymen birge, Jospar aıasynda forvardtyq jetkizýler júıesin damyta otyryp, agroónerkásip kesheni jáne saýda sýbektileriniń arasynda uzaq merzimdi turaqty sharýashylyq baılanystardy ornatý sharalaryn da qarastyrý kerek», - dedi Premer-Mınıstr.

Onyń aıtýyna qaraǵanda, azyq-túlik qaýipsizdigin qamtamasyz etýde shyǵarylatyn tamaq ónimderiniń sapasy da mańyzdy oryn alady.

«Bul baǵytta veterınarlyq jáne fıtosanıtarlyq baqylaý men tamaq ónimderin sertıfıkattaý jumystaryn jetildirýdiń mańyzy zor. Sondaı-aq agrarlyq ǵylymdy damytý qajet. Ǵylymı zertteý protsesteriniń ıntegratsııasyn, kadr daıyndaý jáne ǵylymı jetistikterdi óndiriske engizýdi qamtamasyz etý kerek.

Bul úshin Josparda agrarlyq ýnıversıtetter bazasynda quramyna agrarlyq ǵylymı ınstıtýttar men tájirıbelik sharýashylyqtardy qosa otyryp, zertteý ortalyqtaryn qurý boıynsha naqty mindetterdi qarastyrý qajet», - dedi Úkimet basshysy.