Azyq-túlik korporatsııasyna jemdik astyq satyp alýǵa 20 mlrd teńge bólindi

NUR-SULTAN. QazAqparat – Azyq-túlik kelisimshart korporatsııasy jemdik astyqty tonnasyna 117 myń teńgeden satty, dep habarlaıdy QazAqparat tilshisi.

«Azyq-túlik korporatsııasynyń jarǵylyq kapıtalyn ulǵaıtýǵa, qus jáne mal sharýashylyqtary úshin arzandatylǵan baǵamen 200 myń tonna kóleminde jemdik astyq satyp alýǵa respýblıkalyq bıýdjetten 20 mlrd teńge bólindi», - dep atap ótken Aýyl sharýashylyǵy mınıstrliginiń QazAqparatqa bergen málimetinde.

Vedomstvo málimetinshe, qazirgi ýaqytta Azyq-túlik korporatsııasy elimizdegi qus ósirýshi sharýashylyqtaryna tonnasyna 117 myń teńgeden 22 myń tonnadan astam jemdik astyq satty.

«Aýyl sharýashylyǵy taýaryn óndirýshilerdi egin men mal shyǵynynan qorǵaý úshin agroónerkásiptik keshendi erikti saqtandyrý júıesi jumys isteıdi, onyń operatory retinde «Agrarlyq nesıe korporatsııasy» AQ bekitilgen. Osy júıe aıasynda saqtandyrý aqylarynyń 50% sýbsıdııalaý júzege asyrylady», - dep atalyp ótken mınıstrlik habarlamasynda.

Budan buryn habarlanǵandaı, jalpy jazdyq egis 23 mln gektarǵa josparlanǵan.

Onyń ishinde dándi jáne dándi-burshaqty daqyldar – 15,8 mln gektar, maıly daqyldar – 2,9 mln gektar, kókónis-baqsha daqyldary men kartop – 475,5 myń gektar, jem-shóp daqyldary 3,7 mln gektar aýmaqty qamtıdy.