«Azyq-túlik kelisimshart korporatsııasy» fermerlerdi qarjylandyrýdy bastady

ASTANA. QazAqparat - Kóktemgi egis naýqany aldynda fermerlerge tuqymǵa qarjy bólý jumystary bastaldy. Bul týraly búgin Ortalyq kommýnıkatsııalar qyzmetindegi brıfıngte «Azyq-túlik kelisim shart korporatsııasy» basqarma tóraǵasynyń orynbasary Sábıt Qashqymbaev málim etti.

Aýa raıynyń qolaısyzdyǵyna baılanysty egin orý naýqany aıasyndaǵy jumystar qıyndaǵanyna, osyǵan oraı keıbir dıqandar tuqym tapshylyǵyn sezinip otyrǵandyǵyna toqtalǵan S.Qashqymbaev: «Azyq-túlik kelisimshart korporatsııasy» aýyl sharýashylyǵy taýarlaryn óndirýshilerdi qoldaý úshin tıisti sharalardy qabyldady, ıaǵnı 27 qarashadan bastap forvardtyq nemese aldyn ala bıdaı satyp alýdy bastadyq. Qazirgi kezden bastap aýyl sharýashylyǵy taýarlaryn óndirýshilerge tuqym satyp alý úshin qarajat beremiz. Olar kelesi jyldyń óniminen túsetin bıdaıdan tapsyryp, mindetin oryndaıdy», - dedi. Onyń sózine qaraǵanda, kepildik retinde Azyq-túlik kelisim shart korporatsııasy Áleýmettik-kásipkerlik korporatsııasynyń kepildemesin qabyldaıdy. «Bıdaıdyń baǵasyn kelesi kúzdegi eginniń jaǵdaıyna, sondaı-aq sol mezgildegi naryqtyń ahýalyna qaraı belgileımiz. Osy oraıda aýyl sharýashylyǵy taýarlaryn óndirýshilerge tıimdi baǵa belgileýge tyrysamyz», - dep atap ótti S.Qashqymbaev. Munymen qosa ol qaryzdy óteý máselesine turǵysynda fermerler bıdaıdy 2015 jyldyń 1 qarashasyna deıingi ýaqytta qaıtarýy kerektigin jetkizdi. Sóz sońynda S.Qashqymbaev aýyl sharýashylyǵy taýarlaryn óndirýshilerge qoıylatyn talaptar aıasynda olardyń «QazAgro» holdınginiń jáne onyń enshiles kásiporyndarynyń, sondaı-aq basqa da qarjy uıymdarynyń aldynda ótelmegen qaryzdary bolmaýy kerektigin aıtty.