Azyq-túlik dúkenine kelgenderge maska taǵýǵa mindetteledi – sanıtarlyq dárigerler

ALMATY. QazAqparat – Almatyda azyq-túlik dúkenderine keletin klıentterdiń barlyǵyna maska taǵý mindetteledi. Bul týraly onlaın brıfıng barysynda qalalyq Taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Natalıa Dıagıleva aıtty, dep habarlaıdy QazAqparat tilshisi.

Azyq-túlik dúkenine kelýshilerde maska joq bolsa, qyzmetkerler betperde berýi tıis.

«Dúkenderge tek maskamen kirýge bolady. Eger kelýshiniń maskasy bolmasa, oǵan qyzmetkerler berýi kerek. Saýda oryndarynda osynyń bárin qadaǵalaıtyn jaýapty tulǵa bolýy tıis. Saýda ornynda sanıtaızerler qoıylýy kerek. Sanıtarlyq torapta sabyn jetkilikti bolýy shart», - dedi ol.

Al dúkenderde qyzmet kórsetetin qyzmetkerler de maska taǵyp, qoldaryna bir rettik qolǵap kııýge mindetteledi.

Natalıa Dıagılevanyń aıtýynsha, maska taýsylǵan jaǵdaıda kásipkerler satyp alýy tıis.

«Kelýshiler de, satýshylar da osy talapty oryndaýy tıis. Olaı bolmaǵan jaǵdaıda jaza qoldanylady», - dedi ol.

Sonymen qatar, erteńnen bastap Almatyda úlken-kishiligine qaramastan azyq-túlik saıtpaıtyn barlyq dúkender men saýda oryndary jabylatyn bolady.