Azyq-túlik, dári-dármek, avtokólik óndirisi artty - ekonomıka mınıstrligi

NUR-SULTAN. QazAqparat – Bıylǵy qańtar-shilde aılarynda Qazaqstandaǵy óndiris kólemi 4,9%-ke ósti. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Óńdeý ónerkásibi boıynsha 17 óńirde ósim tirkeldi. Eń joǵarǵy kórsetkish Shyǵys Qazaqstan, Abaı jáne Qostanaı oblystarynda, sondaı-aq Almaty jáne Shymkent qalalarynda. Atalǵan óńirlerde azyq-túlik taýarlary, munaı ónimderi, qurylys materıaldary, dári-dármek, tústi metalldar, traktorlar, júk jáne jeńil avtokólikter óndirisi artqan», - dedi Ulttyq ekonomıka mınıstri búgingi Úkimet otyrysynda.

Kerisinshe, tómendeý Jetisý, Pavlodar jáne Túrkistan oblystarynda baıqalady. Negizinen un, alkogolsiz sýsyndar, taýar betony, ýran, metall konstrýktsııalary, akkýmýlıator, benzın, dızel otyny, ferrohrom, óńdelmegen alıýmınıı óndirisi qysqarǵan.

Óńdeý ónerkásibi salalary boıynsha mashına jasaý óndirisi 7,7%-ke, onyń ishinde avtomobıl jasaý – 19,6%, kompıýter, elektrondy jáne optıkalyq quraldar jasaý – 13,8%, azyq-túlik taýarlary – 2,8%, sýsyndar – 9,1%, plastmass buıymdary – 5,3%, daıyn metall buıymdary – 3,0%, hımııa ónerkásibi taýarlary – 10,6%, kıim óndirisi – 5,5%-ke artqan. Taý-ken ónerkásibinde óndiris kólemi 1%-ke ulǵaıdy.

Salalar bólinisinde taý-ken ónerkásibinde qyzmet kórsetýde – 18,7%, gaz óndirýde – 2,2%, kómir óndirýde – 1,3%, metall kenderin óndirýde – 0,9%, shıki munaı óndirýde – 0,3% ósim bar. Ózge de paıdaly qazbalardy óndirýde 6,6%-ke tómendeý tirkelgen.

Aıta keteıik, Úkimette Qazaqstannyń qańtar-shilde aılaryndaǵy áleýmettik-ekonomıkalyq damý qorytyndysy qaralyp jatyr. QR Ulttyq ekonomıka mınıstri Álibek Qýantyrovtyń baıandaýynsha, atalǵan kezeńde Qazaqstan ekonomıkasy 3,3%-ke ósken.