Azyq-túlik baǵasyn turaqtandyrý boıynsha jumysty jalǵastyrý qajet – Smaıylov

ASTANA. QazAqparat – Azyq-túlik taýarlarynyń baǵasyn turaqtandyrý jáne tamaq óndirisin yntalandyrý boıynsha belsendi jumysty jalǵastyrý qajet. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«8 aıdyń qorytyndysy boıynsha Batys Qazaqstan, Qostanaı, Qyzylorda, Soltústik Qazaqstan oblystarynda, Almaty jáne Shymkent qalalarynda barlyq negizgi kórsetkishterdiń ósimi tirkeldi. Qalǵan óńirler nysanaly kórsetkishterdiń oryndalýyn qamtamasyz etýi tıis. Qabyldanǵan sharalardyń arqasynda tamyz aıynyń qorytyndysy boıynsha ınflıatsııa 13,1 paıyzǵa deıin tómendedi», - dedi Úkimet basshysy.

Premer-Mınıstr memlekettik organdar men óńir ákimdikteri azyq-túlik taýarlaryna baǵany turaqtandyrý jáne tamaq óndirisin yntalandyrý boıynsha belsendi jumysty jalǵastyrýy qajettigin basa aıtty.

«Ózderińiz biletindeı, Memleket basshysy Joldaýda elimizdiń ekonomıkalyq ósimin orta merzimdi kezeńde 6-7 paıyz deńgeıinde qamtamasyz etýdi tapsyrdy. Bul – Úkimet pen ákimdikter úshin mańyzdy mindet. Osy rette, barlyǵymyzǵa ekonomıkanyń negizgi baǵyttarynda jáne óńirlerde tıisti ósimdi kórsetý úshin tıimdi sharalar qabyldaýymyz kerek. Mınıstrlikter men óńirler ózderine qaraıtyn ekonomıka salalarynda aı saıynǵy ornyqty ósimdi qamtamasyz etýi tıis», - dedi Álıhan Smaıylov.