Azyq-túlik baǵasyn negizsiz kótergenderdiń qalaı jazalanatyny belgili boldy

NUR-SULTAN. QazAqparat – Azyq-túlik baǵasyn negizsiz kótergen kásip ıelerine qandaı jaza taǵaıyndalady? Bul suraqqa QR UEM Básekelestikti qorǵaý jáne damytý komıteti tóraǵasynyń orynbasary Asqar Japparqulov jaýap berdi, dep habarlaıdy QazAqparat tilshisi.

«Áleýmettik mańyzy bar azyq-túlik taýar naryǵyn zertteý barysynda biz baǵanyń bekitilý jelisine, naryqqa taýardyń jetkizilý jaǵdaıyna taldaý jasaımyz. Eger adal básekelestiktiń buzylǵanyn anyqtasaq, biz kásip ıelerin ákimshilik jaýapkershilikke tartamyz. ıAǵnı kásip ıesi sóz baılasý amalymen tapqan paıdasynyń 1-5 paıyz aralyǵyndaǵy úlesin tóleıdi», - dedi Asqar Japparqulov OKQ-da ótken baspasóz máslıhatynda.

Komıtet tóraǵasynyń orynbasary sózin naqty mysaldarmen shegeleı tústi.

«Almatyda kúnbaǵys maıyn satatyn «Prıma Dıstrıbıýshon» JShS-ǵa qatysty is boldy. Kelisimsharttaryn qaraı otyryp, bul kompanııa kúnbaǵys maıyn satý úshin ártúrli baǵany qoldanatynyn anyqtadyq. Bul – básekelik faktory sanalmaıdy. Osyǵan baılanysty oǵan qatysty is júrgizilip, kompanııa basshylyǵy ákimshilik jaýapkershilikke tartyldy», - dedi ol.

Eske sala ketsek, buǵan deıin Saýda jáne ıntegratsııa vıtse-mınıstri Azamat Asqaruly jyl basynan 21 shildege deıin azyq-túlik taýarlarynyń baǵasy 5,7 paıyzǵa óskenin málim etken edi. Áıtse de bul sońǵy bes jyldaǵy rekordtyq ósim dep aıtýǵa kelmeıdi. Azamat Asqaruly 2016 jyly bul kórsetkish birden 9,1 paıyzdyq, al 2019 jyly 7,7 paıyzdyq ósimdi kórsetkenin aıtady.