Azyq-túlik baǵasy qalaı ózgeredi – Magnum jelisi pikir bildirdi
«Ázirge bizdiń jetkizýshilerimiz buryn ákelingen taýarlardy qaıta baǵalaýǵa ótinim bergen joq. Oǵan qosa rýbl men teńge baǵamdarynyń qubylmalylyǵy jáne jetkizý tizbeginiń ózgerýi jańa ımporttyq jetkizilimder men ımporttyq quramy joǵary (ıngredıentterden bastap qaptaýǵa deıin) qazaqstandyq ónimderdiń baǵasyna áser etedi. Baǵany ózgertý orta eseppen 20-25% quraıdy», – dedi Magnum saýda jelisiniń PR-menedjeri Dmıtrıı Shıshkın QazAqparat tilshisine bergen suhbatynda.
Onyń aıtýynsha, qazirgi jaǵdaı teńge baǵamynyń qubylmaly bolýymen ǵana emes, Qazaqstanǵa Reseı arqyly keletin ımporttyq taýardy jetkizý tizbegin buzý qaýpimen de erekshelenedi. Sonymen birge, halyqaralyq brendterdiń edáýir bóligi Reseıde óndiris oshaqtaryn ashqan, olar shetelden shıkizat, komponentter jáne basqa zattardy jetkizýge táýeldi.
«Biz qazir Reseı aýmaǵynan tys jetkizilimdi jolǵa qoıyp jatyrmyz, bul ádettegi jetkizilim tizbegi men basqa da shyǵyn ákeletin ózgeristerge baılanysty taýar baǵasyna áser etýi múmkin», - dep tolyqtyrdy Dmıtrıı Shıshkın.
Spıker qazirgi ýaqytta reseılik óndiris taýarlarynyń paıyzy assortımenttiń shamamen 10%-y ekenin atap ótti. Reseı arqyly basqa elderden ákelinetin ımport – assortımenttiń shamamen 40%-yn quraıdy.
Eske sala keteıik, 24 aqpanda Reseı prezıdenti Vladımır Pýtın Ýkraınada arnaıy áskerı operatsııa jasaý týraly sheshim qabyldady. Sol kúnnen bastap Ýkraınada áskerı jaǵdaı engizildi. Osyǵan baılanysty AQSh pen Eýropa Reseıge birqatar sanktsııalar engizdi.