Azııanyń ulttyq ortalyqtary Astanada bas qosty
«Qazaqstan ultaralyq jáne mádenıetaralyq dıalogty damytýdy qalaıdy. Sol sebepti Azııadaǵy ózara yqpaldastyq jáne senim sharalaryn gýmanıtarlyq turǵyda nyǵaıtý mindeti bizge tapsyryldy. Dál osy mindettiń aıasynda búgingi forým uıymdastyrylyp otyr. Negizgi maqsat - Azııa aımaǵyndaǵy ulttar men ulystardyń dostyq baılanystaryn kúsheıtý», - deıdi QR Syrtqy ister vıtse-mınıstri Aqylbek Qamaldınov.
Osy saladaǵy jumystyń mańyzdylyǵyn Qazaqstan xalqy Assambleıasy tóraǵasynyń orynbasary Darxan Myńbaı da erekshe atap ótti.
«2008 jyldan beri atalǵan forým dástúrli sharaǵa aınaldy. Bıylǵy jıynnyń taqyryby - «Mádenı ashyqtyq - beıbitshilik pen kelisimniń negizi». Biz ony jaıdan jaı tańdaǵan joqpyz. Adamdar men xalyqtardyń arasyndaǵy qarym-qatynastyń basty sharty - mádenı ashyqtyq. Azııadaǵy ózara yqpaldastyq jáne senim sharalary jónindegi keńes aıasyndaǵy baılanystar da ashyq mádenı dıalogqa negizdeledi. Búginde jahandyq qaýip-qaterler kóp. Azııa xalyqtary bolsa, mádenı ashyqtyq arqyly aımaqtaǵy turaqtylyq pen tynyshtyqty saqtaýdy qalaıdy. Búgingi forýmda osy yntymaqtastyqty tereńdetý jaıy talqylanady», - dedi Myńbaı forýmnyń ashylý rásiminde.
Forýmnyń ashylý rásimine Ázerbaıjan, Túrkııa, Reseı, Tájikstan, Qyrǵyzstan, Armenııa, Ózbekstan jáne taǵy basqa memleketterdiń ókilderi qatysty. Barlyǵy birdeı ultaralyq yntymaqtastyqty damytýda saıasat pen ekonomıkadan buryn mádenı baılanystardyń róli zor ekenin erekshe atap ótti.
Aıta ketken jón, forým aıasynda Azııadaǵy ózara yqpaldastyq jáne senim sharalary jónindegi keńes tarıxyna arnalǵan fotokórme ashyldy. Al Úndistannyń mádenı ortalyǵy qazaq tilinde jaryqqa shyqqan «Maxabatxarata», «Rıgveda» men «Dxammapada» epostaryn, sondaı-aq Rabındranat Tagordyń «Tańdamaly óleńderin» alyp keldi. Sonyń barlyǵyn jazýshy Áýbákir Nilibaev aýdarǵan. «Maxabatxarata» eposynyń ózine 30 jyl ýaqyt ketken. Qazaqstan men Úndistan arasyndaǵy mádenı baılanysty damytqany úshin Áýbákir Nilibaev osy eldiń Padmashrı syılyǵymen marapattalǵan bolatyn.