Azııanyń 24 memleketinen 300 balýan Astanaǵa kele jatyr

ASTANA. QazAqparat – 9-14 sáýir aralyǵynda Astanada grek-rım, erkin jáne áıelder kúresinen ótetin 36-shy Azııa chemıponatyna qurlyqtyń 24 elinen 300-den astam balýan qatyspaq, dep habarlaıdy QazAqparat tilshisi.

Bul týraly Mádenıet jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Aıgúl Bektenova ortalyq kommýnıkatsııalar qyzmetinde ótken brıfıngide málim etti.

«9-14 sáýir aralyǵynda Astanadaǵy Jaqsylyq Úshkempirov atyndaǵy «Jekpe-jek» saraıynda kúres túrlerinen osymen 36-shy Azııa chempıonaty ótpek. Bul jarysqa Azııa qurlyǵynyń 24 memleketinen 300-ge jýyq sportshynyń qatysýy josparlanyp otyr. Olardyń arasynda Olımpıada oıyndarynyń 7 júldegeri, Álem chemıpıonattarynyń 5 jeńimpazy qatysady. Sondyqtan, dúbirli doda bolaıyn dep tur. Negizi bul – Azııa chempıonaty, lıtsenzııalyq týrnır emes. Biraq, Azııa oıyndarynyń aldyndaǵy, Álem chempıonatynyń aldyndaǵy negizgi jarystardyń biri bolyp esepteledi», - dedi komıtet ókili.