Azııadaǵy eń iri bıýdjettik avıakompanııanyń ushaqtary Qazaqstanǵa da qatynaıdy

ASTANA. QazAqparat - QR Indýstrııa jáne ınfraqurylymdyq damý mınıstri Qaıyrbek Óskenbaev Air Asia Aviation Group kompanııasy tobynyń kommertsııalyq dırektory Karen Chan hanymmen kezdesti, dep habarlaıdy QazAqparat mınıstrliktiń baspasóz qyzmetine silteme jasap.

Kezdesý barysynda taraptar Qazaqstan men Malaızııa arasyndaǵy turaqty jolaýshylar tasymaly jáne júk áýe qatynasy máselelerin talqylady.

Air Asia Aviation Group ókilderi avıakompanııanyń birinshi kezeńde Kýala-Lýmpýr (Air Asia X) men Bangkoktan (Thai Air Asia X) Almatyǵa árbir baǵyt boıynsha aptasyna 4 reıs jıilikpen jáne aptasyna 3 reıs jıilikpen Astanaǵa ushatyn reısterdi iske qosýdy josparlap otyrǵandaryn jetkizdi.

Sondaı-aq Air Asia áýe kompanııasy Qazaqstan aýmaǵynda «vırtýaldy hab» qurýdy, sonymen birge Ystanbul (Túrkııa), Parıj (Frantsııa), Frankfýrt (Germanııa), London (Ulybrıtanııa) qalalaryna «aýa erkindiginiń» besinshi dárejesimen ushýdy josparlap otyr. Eki el arasyndaǵy reısterdiń ashylýy saýda-ekonomıkalyq qatynastardy, týrızm men iskerlik yntymaqtastyqty odan ári damytýǵa yqpal etedi dep kútilýde.

Aıta keterligi, Air Asia Azııadaǵy eń iri bıýdjettik avıakompanııa bolyp tabylady. Óz jumysyn 1996 jyly bastaǵan, búginge deıin 600 mıllıonnan astam jolaýshy tasymaldaǵan. Sonymen qatar kompanııanyń áýe kemeleri álemniń 25 elinde 400-den astam baǵyt boıynsha ushady. Áýe kemeleri parkinde 250-den astam ushaq bar.

Kezdesýge Azamattyq avıatsııa komıtetiniń tóraǵasy Talǵat Lastaev, Air Asia Aviation Group kompanııasy tobynyń kirister men baǵyttar jónindegi dırektory Pol Kerrol myrza, Air Asia X avıakompanııasynyń atqarýshy dırektory Benıamın Ismaıl myrza qatysty.