Azııa jastaryna arnalǵan vırtýaldy alań qurý usynyldy

NUR-SULTAN. QazAqparat – Azııa elderiniń jastary ózara qarym-qatynasty damytyp, ortaq máseleni birlesip sheshý úshin vırtýaldy alań ornatý máselesi qozǵaldy, dep habarlaıdy QazAqparat tilshisi.

«Búgingi forým qorytyndysy boıynsha bir-birimizben ózara is-qımyl jasaý úshin vırtýaldy alań ornatýdy usynǵym keledi. Ol jerde ortaq problemalardy talqylaýǵa bolady. Qazaqstanda jastarǵa arnalǵan tabysty iske asyp jatqan birqatar bastama bar. Sonyń biri - «Bolashaq» baǵdarlamasy. Atalǵan jobanyń arqasynda kóptegen jastar shetelde bilim alyp jatyr. Jarqyn jobalardyń biri – Prezıdenttik jastar kadrlyq rezervi», - dedi QR Aqparat jáne qoǵamdyq damý vıtse-mınıstri Aleksandar Danılov elordada ótip jatqan Azııadaǵy ózara is-qımyl jáne senim sharalary boıynsha V jastar keńesi barysynda.

Onyń aıtýynsha, elimizde ósemin degen jastarǵa múmkindik bar jáne ol bárine birdeı.

Sondaı-aq, mınıstrdiń orynbasary Qazaqstan jastar saıasaty máseleleri boıynsha Azııa elderimen tájirıbe almasýǵa daıyn ekendigin jetkizdi.

Buǵan deıin Aleksandr Danılov elimizde jastar saıasaty jónindegi keńes jumysyn qaıta jasaqtaý kerektigin alǵa tartty.

Aıta ketsek, Nur-Sultan qalasynda Azııadaǵy ózara is-qımyl jáne senim sharalary boıynsha jastar keńesiniń besinshi otyrysy ótip jatyr.