Azııa oıyndary: Eskek esýshiler taǵy bir medalǵa qol jetkizdi

ASTANA. QazAqparat - Qazaqstan quramasy Indonezııada ótip jatqan jazǵy Azııa oıyndarynda taǵy bir medal enshiledi, dep habarlaıdy QazAqparat QR Ulttyq olımpıada komıtetine silteme jasap.  

Atap ótilgendeı, Palembangtaǵy fınaldyq kezeńde baıdarka men kanoede eskek esýshiler kúmis júldege qol jetkizdi. Ilıa Golendov pen Andreı Ergýchev 1000 metrge eki adam bolyp jarysýda baq synaǵan bolatyn. Qazaqstandyq sportshylardyń aldyn qytaılyqtar orap ketti.

I. Golendov pen A. Ergýchev jubynyń kórsetkishi - 3.23.815. Al altyn júlde alǵan Qytaı komandasynyń ýaqyt kórsetkishi - 3.23.601.

Qola júlde Ózbekstan komandasynyń enshisinde. 

Eske sala keteıik, búgin tańerteń tórt adamdyq synda Qazaqstan komandasy altyn medalǵa ıe bolǵan edi.

Sondaı-aq habarlanǵandaı, baıdarka men kanoede eskek esýden áıelder arasyndaǵy jarysta Anastasııa Berezovskaıa (500 metrge jarysýdan) máre syzyǵyn 6-shy bolyp kesip ótti. Bul synda Qytaı, Iran jáne Ońtústik Koreıa sportshylary top jardy. 

30 tamyz kúni Ulttyq qurama sporttyń 9 túrinen baq synaıdy.