Azııa oıyndary: Búgin kimder saıysqa túsedi

<p>Qazaqstandyq karate jáne djıý-djıtsý sheberleri Qytaıdyń Hanchjoý qalasynda ótip jatqan Azııa oıyndarynda oıyn kórsetýin bastady, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Búgin, 5 qyrkúıekte el quramasynan Nurqanat Ájiqanov dúbirli dodadaǵy alǵashqy jekpe-jeginde nepaldyq qarsylasymen básekege túsedi. Al qazaqstandyq Laýra Áliqul jartylaı fınalda saıysqa túsedi.

Sondaı-aq, djıý-djıtsý sportynan Aldııar Serik, Mansur Habıbýlla, Darhan Nortaev, Nurjan Batyrbekov, Nazgúl Rahaeva, Ásemhan Isahanova Azıadadaǵy bastapqy kezeńderdegi saıystaryn ótkizedi.

Oǵan qosa grek-rım kúresinen Islam Ýmaev pen Álimhan Syzdyqov shırek fınal joldamasyn sarapqa salady.

Áıelder kúresinen Svetlana Ankıcheva, Marına Sedneva jáne Emma Tısına boz kilemge şyǵady.

Aıta ketsek, búgin bokstan erler men áıelder arasynda básekeler bolady. El quramasynan Qamshybek Qońqabaev (92 keliden joǵary) jáne Karına Ibragımova (57 keli) fınalda oıyn kórsetedi.

Qazaqstandyq veloshabandozdar Alekseı Lýtsenko, Evgenıı Fedorov, Dmıtrıı Grýzdev jáne Gleb Brýsenskıı toptyq saıysta synǵa túsedi.

Qazaqstandyq sportshylar esý slalomynda saıysqa tússe, gandboldan Qazaqstan áıelder quramasy 3 oryn úshin Qytaımen oınaıdy.

Búgin jeńil atletıka baǵdarlamasy aıaqtalady.

Qazir el quramasy enshisinde 51 medal (5 altyn, 11 kúmis, 35 qola) bar. Medaldar kestesinde 13-orynda tur.

Bul jóninen Qytaı 314 medal alyp, (169 altyn, 94 kúmis, 51 qola) kósh bastaǵan. Odan keıingi oryndar Japonııa (147 medal: 37 altyn, 51 kúmis, 59 qola), Ońtústik Koreıa (146 medal: 33 altyn, 45 kúmis, 68 qola) enshisinde.