Azııa qalamgerlerine ortaq ádebı jýrnal ashý qajet – tájik aqyny

NUR-SULTAN. QazAqparat – Azııa qalamgerlerine ortaq ádebı jýrnal ashý qajet. Elordada ótip jatqan Azııa elderi qalamgerleriniń tuńǵysh forýmynda Tájikstannyń halyq aqyny Gýlnazar Keldıev osyndaı usynys jasady, dep habarlaıdy QazAqparat tilshisi.

«Keńes odaǵy zamanynda Afrıka men Azııa jazýshylarynyń yntymaqtastyq komıteti bolǵan edi. Sol kezde biz jınalyp, sóz bostandyǵy, táýelsizdik, halyqtardyń sana-sezimi jaıynda aıtyp, jeńiske jettik. Kóptegen memleket táýelsizdigin aldy. Bul búil álemdegi uly qozǵalys bolatyn. Biraq, KSRO kúıregennen keıin bizde mundaı basymyzdy biriktiretin organ bolmady. Osy oraıda bizdiń qazaq baýyrlarymyz bul baǵytta ilgeri jyljyp, qýantyp otyr. Jahandaný jaǵdaıynda bul óte mańyzdy», - dedi tájik aqyny QazAqparat tilshisine bergen suhbatynda.

Sonymen qatar ol forýmnyń ashylý rásimine Qazaqstan Prezıdenti Qasym-Jomart Toqaevtyń Azııa memleketteriniń mundaı forýmyn turaqty ótkizip turý jáne «Azııa alyby» syılyǵyn taǵaıyndaý usynystaryna qoldaý bildirdi.

«Osyǵan baılanysty bizdiń ortaq jýrnalymyzdy shyǵarý qajet. Onda shyǵarmalarymyzdy bárimizge qoljetimdi tilde jarııalap otyrǵan jón. Máselen, aǵylshyn, orys jáne arab tilderin tańdaýǵa bolady. Bul bizdiń jas avtorlarymyzdyń tanymaldyǵyn arttyrýǵa septigin tıgizer edi. Biriktirýshi qozǵalys búgingi syn-tegeýirinder men problemalardy, onyń ishinde álemde oryn alyp jatqan zulymdyqtar men qantógisterdi sheshý úshin de qajet. Óıtkeni, munaı tereń ári ótkir problemalardy sheshýge rýhanı damý ǵana óz septigin tıgize alady», - dedi Gúlnazar Keldıev.