Azııa damý banki Qazaqstannyń energetıka salasyna qarjy quıady
«Sizder baıqamaǵan shyǵarsyzdar, biz Azııa damý bankimen yntymaqtastyq jáne ózara kelisim týraly memorandýmǵa qol qoıdyq. Azııa damý banki osy mınýttan bastap elimidiń energetıka salasyndaǵy jobalardy qarjylandyrady. Búgin soǵan qol jetkizdik. Tashkenttegi kezdesýde bul másele sheshilmeı qalǵan edi», - dedi mınıstr.
Onyń atap ótýinshe, atalǵan kelisimdi bolashaq is-qımyldyń negizi deýge bolady.
«Azııa damý bankimen qarym-qatynastyń negizgi baǵyttaryn kelesi jyldary júzege asyra bastaımyz. Memorandýmǵa sáıkes, balamaly energııa kózderi, munaı jáne gaz-hımııa, gaz paıdalanatyn energııa stansalary baǵyttarynda yntymaqtastyq ornatamyz. Bolashaqta osy baǵyttar boıynsha jobalar júzege asady. Kerekti qujattardy Azııa Damý bankine ótkizemiz, tıisti saraptamalardan keıin qansha qarajat jumsalatyny belgili bolady», - dedi ol.
Qanat Aldabergenuly atalǵan bank Qazaqstan ekonomıkasyna qansha qarjy quıatyny ázirshe belgisiz ekenin aıtty.
«Qansha kólemde qarjylandyratynyn áli aıta almaımyz. Óıtkeni, bir jobany bank taǵy bir bankpen birge qarjylandyrýy múmkin. Biraq, bir jyldan keıin qarajat boıynsha naqty málimet beremiz», - dep ýáde berdi mınıstr.