Azııa chempıonatynda jeńgen balýandardyń jattyqtyrýshylaryna da aqshalaı syıaqy beriledi

ASTANA. QazAqparat – Astanadaǵy Azııa chempıonatynda jeńiske jetken balýandarǵa qansha syıaqy beriledi? Bul saýalǵa Mádenıet jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Aıgúl Bektenova jaýap berdi, dep habarlaıdy QazAqparat tilshisi.

«Bul jarysta úsh kúres túrinen elimizdiń namysyn 30 sportshy qorǵaıdy. Olardyń orta jasy grek-rım kúresinen – 29 jas, áıelder kúresinen – 25 jas jáne erkin kúresten – 24 jas bolyp keledi», - dedi komıtet ókili ortalyq kommýnıkatsııalar qyzmetinde ótken brıfıngide.

Sondaı-aq, ol chemıponat júldegerlerine beriletin aqshalaı syılyqtyń kólemin atady.

«Azııa chempıonatynan birinshi oryn alǵan sportshylarǵa 2 300 dollar, ekinshi oryn alǵandarǵa 1 400 dollar jáne úshinshi oryn alǵan sportshyǵa 900 dollar syıaqy qarastyrylǵan. Osyndaı syıaqy jattyqtyrýshylarǵa da berilmek. Sonymen qatar, «Halyqaralyq dárejedegi sport sheberi» degen ataq qarastyrylǵan.

Buǵan deıin habarlaǵanymyzdaı, 9-14 sáýir aralyǵynda Astanada grek-rım, erkin jáne áıelder kúresinen ótetin 36-shy Azııa chemıponatyna qurlyqtyń 24 elinen 300-den astam balýan qatyspaq.