Azııa chempıonatynda qazaqstandyq eki balýan fınalǵa shyqty

ASTANA. QazAqparat – Iordanııa astanasy Amman qalasynda ótip jatqan Azııa chempıonatynda erkin kúresten elimizdiń 15 jasqa deıingi jasóspirimder quramasynan eki balýan fınalǵa shyqty, dep habarlaıdy QazAqparat tilshisi.

12 shildeden bastap kúres túrlerinen 15 jáne 20 jasqa deıingi jasóspirimder men jastar arasynda Azııa chempıonaty ótip jatyr.

Jarystyń úshinshi kúninde erkin kúresten 15 jasqa deıingi jasóspirimder synǵa tústi. Olardyń arasynan eqazaqstandyq eki balýan fınalǵa joldama aldy.

El quramasynan Saıat Ábdýalı (44 keli) men Bekasyl Asambek (52 keli) qarsylas shaq keltirgen joq.

​«Endi olar elorda ýaqytymen 21:00-de bastalatyn fınaldyq beldesýde bas júldeni sarapqa salady. Saıat Ábdýalı ırandyq Keıvan Arshadgasabsaraımen kezdesse, Bekasyl Asambek japon Taıga Hıbarınomen kúsh synasady», - dedi Qazaqstan kúres federatsııasy baspasóz qyzmetiniń jetekshisi Aspandııar Esenjolov.

Eske salsaq, budan buryn Azııa chempıonatynda áıelder kúresinen elimizdiń 15 jasqa deıingi jasóspirimder quramasy 3 medal aldy.

Sondaı-aq, qurlyqtyq dodada grek-rım kúresinen elimizdiń 15 jasqa deıingi jasóspirimder quramasynyń enshisinde 8 medal bar.