Azııa chempıonatynda 19 jastaǵy Sanjar Táshkenbaı ózbekstandyq boksshyny utty

ASTANA. QazAqparat – Iordanııanyń Amman qalasynda ótip jatqan Azııa chempıonatynda Sanjar Táshkenbaı ózbekstandyq boksshyny utty, dep habarlaıdy QazAqparat tilshisi.

Sanjar 48 kelige deıingi salmaqta ózbekstandyq Asılbek Djalılovpen qolǵap túıistirdi.

Jekpe-jek qazaqstandyq boksshynyń aıqyn basymdylyǵymen ótip, tóreshiler bir aýyzdan jeńisti 19 jastaǵy Sanjar Táshkenbaıǵa berdi.

S.Táshkenbaı jastar arasynda álem jáne Azııa chempıony bolsa, qarsylasy da osal emes. Ol bıyl 22 jasqa deıingiler arasynda Azııa birinshiliginde top jarǵan.

Osylaısha, Sanjar komandalasy Sanatáli Tóltaevtyń ketken esesin qaıtardy. S.Tóltaev 63,5 kelige deıingi salmaqta ózbekstandyq Rýslan Abdýllaevtan utylyp qalǵan bolatyn.

Búgin rıngke shyqqan úsh qazaqstandyq boksshy da jekpe-jekterin sátti ótkizdi.

Eske sala keteıik, budan buryn bokstan Azııa chempıonatyn Serik Temirjanovtyń jeńispen bastaǵanyn, Sáken Bıbosynovtyń bastapqy kezdesýin sátti ótkizgenin jazǵan bolatynbyz.

Sondaı-aq Nazym Qyzaıbaı Azııa chempıonatynyń ¼ fınalyna ótti.

Azııa chempıonatynda búgin qazaqstandyq úsh boksshynyń rıngke shyǵatyny habarlandy.

Bokstan Azııa chempıonatynda Dýlat Bekbaýov shırek fınalǵa joldama aldy.

Azııa chempıonatynda Aslanbek Shymbergenov qarsylasyn nokaýtpen jeńdi.

Foto: sports.kz