Azııa chempıonaty: Sabyrjan Aqqalyqov kúmisti qanaǵat tutty

ASTANA. QazAqparat – Bokstan 22 jasqa deıingi sportshylar arasyndaǵy Azııa chempıonatynda qazaqstandyq Cabyrjan Aqqalyqov kúmis júlde aldy, dep habarlaıdy QazAqparat tilshisi.

Qurlyqtyq dodada Sabyrjan Aqqalyqov (71 keli) ózbekstandyq Nýrıslom Ismoılovpen qolǵap túıistirdi. Alǵashqy raýndta tóreshiler sheshimi ekige bólindi. Ekeýi qazaqstandyq boksshyǵa qoldaý bildirse, úsheýi ózbekstandyq bylǵary qolǵap sheberiniń basym ekenin kórsetti.

Osyny bilgen Sabyrjan ekinshi raýndta qarqynyn arttyra tústi. Nátıjesinde, qarsylasy nokdaýn alyp qaldy. Bul joly tóreshilerdiń úsheýi Sabyrjannyń basym ekenine senim bildirdi.

Úshinshi raýndta qarsylastar ashyq aıqasqa kóshti. Bir-birine jıi soqqy jasady. Jalpy, qorytyndyda tóreshiler jeńisti ózbekstandyq boksshyǵa berdi. Osylaısha, Sabyrjan kúmis júldeni qanaǵat tutty.

Eske salsaq, búgin qurlyqtyq dodada Sanjar Táshkenbaı (48 keli) men Nursultan Altynbek (54 keli) jeńimpaz tuǵyryna kóterildi.

Sondaı-aq, Mahmýd Sabyrjan (57 keli) taılandtyq Saravýt Sýkthettyń osal tusyn tapty.

Al, qazaqstandyq Abzal Serik ózbekstandyq Behzod Hamıdovqa ese jiberip, qola júledeni qanaǵat tutty.

Endi el quramasynan Dıas Moljigitov (75 keli) taǵy bir ózbekstandyq Alohon Abdýllaevpen sheberlik baıqasady.

Foto: ASBC