Azııa chempıonatynyń júldegerleri el birinshiligine qatyspaıdy - Qaırat Sátjanov

<p>ASTANA. KAZINFORM &mdash; Erteń, ıaǵnı 18 jeltoqsan kúni Qaraǵandy qalasyndaǵy Serik Sápıev atyndaǵy boksty damytý ortalyǵynda bokstan Qazaqstan chempıonaty bastalady.</p>

Osyǵan oraı, bokstan Ulttyq quramanyń bas bapkeri Qaırat Sátjanov shaǵyn suhbat berip, el birinshiligine kimder qatysyp, kimder qalys qalǵany týraly aıtyp berdi.

- El birinshiligine elimizdiń ár óńirinen (erler jáne áıelder) 400- den asa boksshy qatysady. Olardyń arasynda Ulttyq quramanyń kóshbasshy boksshylary da bar. Alaıda, ótkende ǵana Taıland koroldiginiń Chıangmaı qalasynda bokstan ótken Azııa chempıonatynda el qorjynyna júlde syılaǵan boksshylarymyz ishki birinshilikten bosatyldy, - dedi bas bapker.

Sonymen qatar, Azııa birinshiliginde júlde alǵan bosshylar el chempıonatyna qatyspasa da, jarys tartysqa toly bolaryna senim artyp otyrǵanyn jasyrmady.

 - Qurlyq birinshiliginde júlde alǵan boksshylar El chempıonatyna daıyndalyp úlgermeıtini anyq. Sondyqtan olardy bosattyq. Bizde ózge de myqty boksshylar jeterlik. Ár óńir ózderiniń eń tańdaýly sportshylaryn jarysqa qosady. Endi ǵana eresekter dýyna qosylyp jatqan jas talantty boksshylar bar. Sondyqtan, el chempıonaty tartysqa toly bolaryna senemin. Jańa chempıondar, jańa esimder anyqtalatyn kún alys emes, - dep atap ótti Qaırat Sátjanov.

Aıta keteıik, bokstan Qazaqstan chempıonaty 18-24 jeltoqsan aralyǵynda Qaraǵandy qalasynda ótedi. Jarystyń resmı ashylý saltanaty 18 jeltoqsan saǵat 14:00-ge josparlanǵan. Ár kúni jarys 14:00-de bastalady.