ASTANA. KAZINFORM - Iordanııa astanasy Amman qalasynda áıelder kúresinen Azııa chempıonatynda Jámıla Baqbergenova fınalǵa joldama aldy.
Qazaqstandyq balýan 72 kelige deıingi salmaqta jartylaı fınalda 2021 jylǵy álem chempıony, Japonııa ókili Masako Fýrýıchımen beldesti.
2021 jyly Norvegııa astanasy Osloda ótken sheshýshi básekede Jámıla dál osy balýanǵa ese jibergen edi.
Baqbergenova bul joly asa tartysty jekpe-jekte qarymta qaıyrdy. Beldesý 2:2 esebimen aıaqtalyp, jeńis sońǵy upaı alǵan Jámılaǵa berildi. Japonııalyqtar chellendj bergenimen, ol eshteńe sheshpedi. Jámılaǵa taǵy bir upaı qosyldy - 3:2.
Otandasymyz qazirge deıin qurlyqtyq dodada alty márte júldege ilikti. 2020, 2022, 2023 jyldarda jeńis tuǵyryna kóterilse, 2021 jyly kúmis, 2019 jyly qola júldeger atandy.
Eske sala keteıik, budan buryn Azııa chempıonatynda áıelder kúresinen búgin qazaqstandyq bes balýan synǵa túsetinin jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).