Ázirbaıjannyń Ortalyq saılaý komıssııasy prezıdent saılaýynyń qorytyndysyn jarııalady

BAKÝ. 10 qazan. QazAqparat - Ortalyq saılaý komıssııasy barlyq saılaý ýchaskeleriniń 99,53 paıyzy bıýlletenderin óńdegennen keıin 9 qazanda, sársenbi kúni Ázirbaıjanda ótken prezıdent saılaýynyń nátıjelerin jarııalady.

Ortalyq saılaý komıssııasynyń málimetterine qaraǵanda, qazirgi memleket basshysy óz básekelesterinen aıtarlyqtaı artyq daýys jınap jeńiske jetti.

Daýys berý qorytyndysyna sáıkes, Ilham Álıev 3 118 287 daýys (84,59 paıyz) jınady.

Bul týraly búgin Bakýde ótken baspasóz máslıhatynda OSK tóraǵasy Mazahır Panahov habarlady.

«Barlyq okrýgter men ýchaskelerdiń kórsetkishteri ýaqytynda kelip tústi. Alaıda, ázirge májbúrli túrde qonys aýdarylǵandar daýys bergen 26 ýchaskeniń hattamasy alynǵan joq. Sondyqtan qazirgi ýaqytta 5492 ýchaskeniń 5466-nyń qorytyndysy belgili boldy», - dedi M.Panahov.

Onyń sózine qaraǵanda, alynǵan málimetterge sáıkes, basqa úmitkerlerdiń jınaǵan daýystary tómendegideı boldy: Djamıl Gasanlı - 5,54 paıyz, Igbal Agazade - 2,38 paıyz, Gýdrat Gasangýlıev - 1,98 paıyz, Zahıd Orýdj - 1,45 paıyz, Ilıas Ismaılov - 1,07 paıyz, Araz Alızade - 0,86 paıyz, Faradj Gýlıev - 0,86 paıyz, Hafız Gadjıev - 0,66 paıyz, Sardar Djalaloglý - 0,61 paıyz.