Ázil-qaljyń maıtalmandary elordada esten ketpes kesh ótkizbek

ASTANA. QazAqparat - 1 qyrkúıek kúni Astananyń 20 jyldyǵyna arnalǵan «Astana Azil Star Fest» mega jobasy ótkiziledi. Qaıtalanbas ázil keshiniń ótetini jaıly QR Mádenıet jáne sport mınıstrligi baspasóz hatshysy Aıdar Qyryqbaı óziniń feısbýk paraqshasynda jazdy, dep habarlaıdy QazAqparat tilshisi.

«Qazaqstan Respýblıkasy Mádenıet jáne sport mınıstriligi Astana qalasynyń 20 jyldyǵyna oraı TMD elderiniń beldi ártisteriniń jáne otandyq satıra salasy úzdikteriniń qatysýymen aýqymdy ázil festıvalin uıymdastyrýdy kózdep otyr. «Astana Azil Star Fest» - bul ázil salasynda buryn sońdy bolmaǵan mega joba. Qaǵytpa qaljyńnyń maıyn iship, jiligin shaqqan ázilkeshter men ázil-syqaq teatrlarynyń dýmandy keshi», - dep jazady Aıdar Qyryqbaı.

Keshti elimizge tanymal shoýmen Tursynbek Qabatov júrgizedi. Ázilkeshter bas qosatyn kesh elordadaǵy «Qazaqstan» ortalyq kontsert zalynda ótedi. Bir sahnada «Óner qyrandary», «Aldaraspan teatry», «Ázil áleminiń» akterleri, «Ázilmen» jobasynyń úzdikteri bas qospaq.