Azyq-túlik korporatsııasy muqtaj fermerlerge 200 myń tonna tuqym taratýǵa mindetteldi

<p>ASTANA. KAZINFORM &ndash; Premer-mınıstr Oljas Bektenov Úkimet otyrysynda Azyq-túlik korporatsııasyn óz qorynan 200 myń tonna tuqymdy muqtaj fermerlerge taýarlyq kredıt retinde taratýǵa mindettedi.</p>

«Sapaly tuqym qory men tuqym ımportyna táýeldilik boıynsha da problemalar jetkilikti. Ásirese, bul usaq jáne orta sharýashylyqtar úshin ózekti bolyp otyr. Fermerler jaqsy tuqymǵa qol jetkizý múmkin emestigin aıtyp, shaǵymdanady.

Azyq-túlik korporatsııasy jınaqtalǵan qordan keminde 200 myń tonna tuqymdy muqtaj fermerlerge taýarlyq kredıt túrinde bólýi kerek», - dedi ol.

Premer-mınıstr eldegi klımatqa tózimdi, shyǵarylatyn otandyq tuqym qorynyń kólemin ulǵaıtý qajettigin eske saldy.

«Agrotehnologııalyq talaptardyń saqtalmaýy da ónimniń kólemi men sapasyna keri áserin tıgizip otyr. Eń aldymen, bul – mıneraldy tyńaıtqyshtardyń, pestıtsıdter men ósimdikterdi qorǵaıtyn basqa da quraldardyń qajetti mólsherin qoldanýǵa qatysty másele. 

Bizde ótken jyly tyńaıtqyshtardy qoldaný deńgeıi ǵylymı qajettiliktiń nebári 21%-yn ǵana qurady», - dedi Oljas Bektenov. 

Aıtýynsha, Qarjy, Ekonomıka, Ónerkásip, Aýyl sharýashylyǵy mınıstrlikteri men ákimdikter fermerlerdi tyńaıtqyshtarmen qamtamasyz etý jáne qarjylandyrý máselesin sheshýi qajet. 

«Bul topyraqtyń tozýynan, alqaptardaǵy aramshópterden bolatyn shyǵyndardy da aıtarlyqtaı azaıtýǵa múmkindik beredi», - dedi Úkimet basshysy.