Azıadada qazaqstandyq jeti boksshynyń úsheýi ǵana jarys jolynda qaldy

ASTANA. QazAqparat - Jakartada ótip jatqan Azııa oıyndarynda Myrzaǵalı Aıtjanov senim artqan jeti boksshydan jarys jolynda úsheýi ǵana qaldy, dep habarlaıdy QazAqparat tilshisi.

QR Ulttyq olımpıadalyq komıtetiniń baspasóz qyzmetiniń habarlaýynsha, búgin shırek fınalda judyryqtasqan 49 kelidegi Temirtas Júsipov fılıppındik qarsylasyna ese jiberip, jarysty júldesiz aıaqtady. Ol qarsylasy Paalam Karlomen kezdesip, 1:4 esebimen jeńilis tapty.

Aıta keteıik, osyǵan deıin qurama kóshbasshylarynyń biri 56 kelide synǵa túsken Qaırat Erálıev, 52 keli salmaqtaǵy boksshymyz Azat Mahmetov jáne 60 kelige deıingi salmaqta synǵa túsken Samatáli Tóltaev qarsylastaryna jol berip, jarysty erte aıaqtaǵan bolatyn.

Al, jarysty ary qaraı jalǵastyratyn úsh boksshymyzdyń biri - 69 keli salmaq dárejesinde synǵa túsip jatqan Aslanbek Shymbergenov. Ol keshe qazaqstandyq boksshylar arasynan birinshi bolyp jartylaı fınalǵa shyqqan bolatyn. Ekinshi boksshymyz — 64 keli salmaqtaǵy Bekdáýlet Ibragımov. Ol búgin shırek fınalda taılandtyq Masýk Vıttıchaımen judyryqtasady. Úshinshi boksshymyz — 75 keli salmaqtaǵy Ábilhan Amanqul. Azıada oıyndarynyń ashylý saltanatynda Qazaqstan týyn kóterip shyqqan boksshymyz búgin shırek fınalda taıpeılik Kan Chıaveımmen qolǵap túıistiredi.


FOTO: Salı Sabırov, Qazaqstan UOK baspasóz qyzmeti