QR Ulttyq Olımpıadalyq komıtettiń baspasóz qyzmetiniń málim etýinshe, búgin Azııa oıyndarynda sý dobynan erler arasyndaǵy báseke bastaldy.
Sý dobynan Qazaqstannyń erler komandasy alǵashqy matchyn Ońtústik Koreıa komandasyna qarsy ótkizip, 16:9 esebimen jeńiske jetti.
Qazaqstan komandasynyń kelesi kezdesýi 27 tamyz kúni Sıngapýrge qarsy ótedi.
Esterińizge sala keteıik, keshe Qazaqstan quramasy 8 medal jeńip alǵan bolatyn. Naqtyraq aıtqanda, veloshabandoz Alekseı Lýtsenko quramaǵa úshinshi «altyndy» salsa, kúmis medaldy juptasa shyqqan tennısshiler Aleksandr Býblık pen Denıs Evseev alyp berdi. Qola medalge djıý-djıtsýdan Nurjan Seıdýáli men Nartaı Qajekov, tennısshi juptan Gúzál Aınıtdınova/Anna Danılına men Aleksandr Nedovesov/Anna Danılına, júzýden Dmıtrıı Balandın men dál sol sport túrinen Qazaqstan erler quramasy qol jetkizdi.
Osylaısha, Qazaqstan quramasy 34 medalmen Azııa oıyndarynyń jalpy reıtınginde 11 orynda keledi.