Azıada-2018: Qazaqstan quramasy 34 «qolany» jeńip aldy

ASTANA. QazAqparat - Indonezııa astanasy Jakarta qalasynda ótip jatqan XVIII Azııa oıyndarynda jeńil atletıkadan 400 metrge aralas estafetadan júgirýden Qazaqstan quramasy qola medal jeńip aldy, dep habarlaıdy QazAqparat.

QR Jeńil atletıka federatsııasy málim etkendeı komanda quramynda Svetlana Golendova, Dmıtrıı Koblov, Elına Mıhına men Mıhaıl Lıtvın júgirdi. Mundaı aralas estfeta Azııa oıyndarynyń baǵdarlamasyna alǵash ret engizilip otyr.

Fınalda jalpy sany 8 komanda qatysty. Qazaqstannan bólek, Qytaı, Indonezııa, Bahreın, Vetnam, Taıland, Japonııa, Úndistan boldy.

Qazaqstannan aldymen Svetlana Golendova júgirdi. Ol birden estafetany Dmıtrıı Koblovqa ustatty. Sosyn Elına Mıhına men Mıhaıl Lıtvın jalǵastyrdy. Soltústik Qazaqstan oblysynyń atleti márege - 3:19.52 mınýtta jetti. Sóıtip, Qazaqstan úshinshi oryn aldy.

Birinshi oryndy basty favorıt Bahreın eshkimge bergen joq - 3:11.89. Olardyń quramynda Salva Naser men Kemı Adekoııa sekildi osy Azııa oıyndarynda jekeleı synda top jarǵan sportshy boldy. Ekinshi orynǵa Úndistan turaqtady - 3:15.71.

Osylaısha, jeńil atletıkadan Qazaqstan úshinshi qolaǵa qol jetkizdi. Munyń aldynda ıadro serpýshi Ivan Ivanov pen 400 metrge júgirgen Elına Mıhına da qola júlde jeńip alǵan. Odan bólek, 800 metrge júgirýshi Margarıta Muqashevanyń enshisinde bir kúmis medal bar.

Sondaı-aq, bıiktikke sekirýden Qazaqstan komandasynyń múshesi Nadejda Dýbovıtskaıa Azııa oıyndarynyń qola júldegeri atandy. Ol Qazaqstan qorjynyndaǵy 34 qola medal boldy.