Azıada-2018: Dmıtrıı Balandın ne sebepti kózine jas alǵanyn aıtty

ALMATY. QazAqparat - Qazaqstandyq júzgish Dmıtrıı Balandın 2018 jylǵy Azııa oıyndarynyń nátıjesine qatysty pikir bildirdi, dep habarlaıdy QazAqparat tilshisi.

«Men shyn máninde rızamyn. Árıne, ótken jylǵy Azııa oıyndarymen salystyrǵanda júzege aspaı qalǵan oılarym boldy, degenmen, janymda bolǵan adamdar qandaı qıyndyqtan ótkenimdi biledi. Ókinishke qaraı, oıyndardyń aldynda 2 jaraqat aldym, sol sebepti qatysýym ekitalaı edi. Bir kezde ózimdi birshama jaqsy sezine bastadym. Nátıjesi belgili: 3 medal ıelendik, komandaǵa medal alýǵa qol ushymdy sozǵanyma qýanamyn», - dedi Dmıtrıı Balandın.

Sondaı-aq, júzgish Azııa oıyndary kezinde nelikten kóz jasyna erik bergenin aıtty.

«Men shynymen komandamen birigip, jeńiske jetkim keldi. Jalǵyz ózim barlyq medaldardy ıelengendikten, osy joly komanda quramynda oınap, joǵary nátıje kórsetkenimizdi qaladym. Osylaısha, Qazaqstandaǵy júzý sportyn, komandalyq júzýdi damytyp, jigitterdi qolynan bári keletinine sendirgim keldi», - deıdi sportshy.

Eske salaıyq, 2018 jylǵy Azııa oıyndarynda qazaqstandyq sportshylar 15 altyn, 17 kúmis jáne 44 qola medal ıelengen edi. Bıyl Qazaqstan Azıada oıyndarynyń qorytyndysy boıynsha, alǵash ret TOP-5-ke enbeı qaldy.