Azıada-2018: Arystanbek Muhamedıuly sportshylardy qoldaý úshin Indonezııaǵa keldi
«Búgin bastalatyn XVIII Jazǵy Azııa oıyndaryna Indonezııaǵa keldim. Birden sportshylarmen kezdesý úshin Olımpıadalyq aýylǵa bardym. Olardyń kóńil-kúıi jaqsy, jarystarǵa daıyn, bárlerińizge sálem aıtyp jatyr! Bizdiń Ulttyq Qurama qatarynda 440 sportshy bolsa, onyń 404-i 25 olımpıadalyq sport túrinen baq synaıdy. XVIII Jazǵy Azııa oıyndarynyń ashylý saltanatynda elimizdiń kók týyn boksshy Ábilhan Amanqul alyp shyǵady», - dep jazady mınıstr óziniń Facebook-tegi paraqshasynda.
Sondaı-aq, Arystanbek Muhamedıuly Mınıstrlik Ulttyq Olımpıada komıtetimen birlesip, Qazaqstannyń qurama komandasynyń Azııa oıyndaryna sapaly daıyndyǵy úshin barlyq jaǵdaıdy jasaǵandyǵyn jetkizdi.
«Olar jarys ótkiziletin ýaqytta ulttyq komanda múshelerine qajetti kásibı kómek kórsetetin keshendi ǵylymı toptardyń mamandarymen, táýlik boıy bizdiń sportshylar úshin qyzmet kórsetetin dárigerler, psıhologtar men kezekshi massaj jasaýshy mamandarmen qamtamasyz etilgen», - dedi ol.
Aıta keteıik, 2018 jylǵy Jazǵy Azııa oıyndarynda jalpy esebi 462 medaldar jıyntyǵy sarapqa salynady, onyń ishinde 363 júlde olımpıadalyq sport túrlerinen óz ıesin tabady. Jarystar Djakarta men Palembang qalalarynda ótedi, eki jerde de sport nysandary ornalasqan. Djakarta qalasynda ótetin sport túrleri - jeńil atletıka, boks, dzıýdo, kúres túrleri, velosport (trek, shosse, maýtınbaık), sý polosy, zamanaýı bessaıys, taekvondo, semserlesý, karate, regbı, júzý, gandbol, sınhrondy júzý, sadaqpen atý, kórkem gımnastıka, jelkendi sport, shóptegi hokkeı, slalom esý, sportyq gımnastıka, voleıbol, golf, basketbol, basketbol 3h3, batýtta sekirý. Palembangte ótetin jarystar - akademııalyq esý, baıdarkamen esý jáne kanoe, oqpen atý, stendtik atý, trıatlon, jaǵajaı voleıboly, sporttyq quzǵa órmeleý, tennıs.
Eske salsaq, Djakarta men Palembang qalasynda 2018 jylǵy Azııa oıyndarynyń resmı saltanatty ashylý rásimi ótetindigi týraly buǵan deıin jazǵan bolatynbyz.